الجوز المتبهدل للشاعر راضى على الطهطاوى

وعليَّا نادت زَوْجــــــتي** يا ادلعدي اصحى وفوق
بكره الأجازة بلاش كسل** دا الليل مقدَّس ليه حقوق
والصبح تغسل هـــدمتك ** وانزل على أجدعها سوق
هات الخضار المُـــــعتبر** والكبدة بتقوِّي العــروق
والفاكهة هات مسـتوردة ** خلي العيال تفرح تدوق
والشقة لازم تتـــــــمسح ** عايزاها ألمع من بُروق
والفرخة تبقى مــــحمَّرة ** اوعى الشياط يعمل حروق
وابنك دا رايح يمتـــــحن ** ادفع حساب مستر فاروق
بنتك كمان جالها العريس** جهز بسرعة بلاش تـُعُوق
والقهوة اوعى تخـــــشها ** صاحبك هيمسك فيك لزوق
عايزين نفســـــح بالولاد ** وكمان نزور اختك شروق
جزمة وتايير أخرموديل **  وبلاش تدلدل ف العنوق
حاسة بصداع هـــــيا بنا ** نكشف على الجلد وشقوق
دا خطيبتي كات متروشنة ** بعد الجواز عكس وفـُروق
وبقيت باتوه في دنـــيتي ** وتقول مقصِّر فيه عقوق
أنا كنت فاكر إنـــــــني ** بعد الجواز هافضى وهاروق
طلع الجواز دا بـــــهدلة ** وساعات يقولوا عليه خازوق