أسرار السعادة : -من ديوان حبة مشاعر ع الورق

ازرع قلبك كله محبة.............ازرع كل القلب حنان
املا حياتك خير وتسامح……..…..تلقى جناين ورد تبان
ابدأ خطوة ف درب طريقك ..ضحكة وشك ضى بريقك
خلـِّى عبير يفوح من سيرتك  رشرش فرحة ف كل مكان
اوعى البسمة تفارق وشك……..… اوعى البهجة تهاجرعشك
افتح سكة لكل طموحك........... اقفل للتكشيرة بيـــبان
انس الماضى وكل جراحه .......حبل الود اديله براحه
اكتب بالألوان على سطر..….…. ارسم حلم بإيد فنــــان
...
اغنم كل ساعات الحاضر...مَلــِّى عنيك م الورد الناضر
خليك صاحى لدق الساعة .........إياك تدى العمر أمـان
مهما الشمس تغيب هتهل..........والأنهار للصحرا تبل
أمنياتك راح تتحقق ..............بس الفرحة دا ليها أوان
...
خلِّى الطير فى سماك بيغرَّد ..لحن هواك بالشوق متفرد
وافرد للأحلام جناحتها...... سيب لحصان الخطوة عنان
ربك شايف كل حمولك....صدق عزيمتك يمحى خمولك
تلقى نشيد الحب غناوى...... ودَق القلب موسيقى كمان
..
اوعى اليأس يقرَّب منك....اوعى الشيب يبان على سنك
خلِّى الطاقة تشع بريقها .....غنوة فرايحى بصوت رنَّان
سيب الحلم يقول غناوي.….. واعزف ليه بالناى ولاغيه
يغمر نور الصبح ملامحه.......سيبه يطير زى الغزلان
...
دوس على حزنك سمِّى وعدِّى .اوعى الفكر يجيب ويودِّى
طول ما الروح ويَّاك متفائلة..تلقى الضحك عزف ألحان
ابدر كل البهجة بإيدك........... ربك من أفضاله يزيدك
بستانك بالحب يخضَّر........ تفضل عطر ف كل زمان