ماما مش عايزة الهدية
ماما مش عايزة الهدية
أو فلوس منك عيدية
ماما عايزاك تبقى طايع
مش مجرد حد صايع
ولا حلمك يبقى ضايع
لمّا بتشوفك تذاكر
تجتهد دايما تِجد
ترسم الأحلام لباكر
فرْحها يطرح يمد
تبقى دايما ف الصدارة
والنتيجة مِية مِية
ماما مش عايزة الهدية
...
ماما عايزاك تبقى جد
مش بتغلط يوم فى حد
نفسها تشوفك جبل
لو زمانها ف مرَّة شد
كل لحظة حب عيدها
مد إيدك قوم ساعدها
لو بتطبخ أو بتغسل
أو بتكوى الجلبية
.....
ماما مش عايزة الهدية
ماما عايزاك تبقى مخلص
لجل أوطانك بلادك
تزرع الخير والمحبة
تلقى ضله فوق ولادك
ترعى كل الأهل صونهم
تسقى من عطفك غصونهم
والزمايل والجيران
بالأدب تمنع أذية
...
ماما مش عايزة الهدية
أو فلوس منك عيدية
كلمة حلوة طالعة من قلبك مريحة
طبطبة تجبر خاطرها
وتراضيها
لو تشوفها ف يوم جريحة
اوعى تقسى ف يوم عليها
لمذَا يضعف نورعينيها
قوللها شايفك صبيه
..
ماما مش عايزة الهدية
ماما عايزاك تبقى راجل
كتف ساند جنب ابوك
خلى اختك جوا عينك
واوعى يوم تجرح اخوك
خلى بالك من صحابك
يجى يوم ياخدك فى سكة
بالخطأ تصح ضحية
ماما مش عايزة الهدية
ماما عايزاك تبقى رايق
تبقى فايق للمدام
تلتلف على أكل عيشك
دا الكسل فقر انعدام
كل ما تراعى ف عيالك
تطرح الأزهار ندية
ماما مش عايزة الهدية
ماما عايزا ألف بوسة
فوق جيبينها
كل صبح وكل ليل
دعوة منها مستجابة
تمنحك عز ومهابة
تحفظك من كل ويل
وتلقى عين الله مَعِيَّة
وتبقى دى أجمل هدية
