الله محبة : للشاعر راضى على الطهطاوى

الحُب للمؤمن شعار 
الحب لمّا يبقى باين
والسماحة تفوح جناين
نلقى حضن الكون دا دافي
تصبح الضلمة نهار
حُب لو عطَّر قلوبنا
يملا ضى النور دروبنا
وكل خطوة ف سكة تحلا
تصبح الدنيا انبهار
قلب لو ضاع حُب مِنُّه
راح يعجِّز قبل سِنُّه 
مهما كان المال في إيده
راح يعيش م الهَم نار 
لمّا بينَّا الحب يطرح 
راح يحلِّي أى مطرح 
والعيون تفرح تغنِّي
يملا كل الكون عمار 
سر حُب يزين وجود 
أحلى غنوة ناي وعود
ألف وردة للي أخلص ف المودة 
واللي سايع كل لون 
عاش يغرَّد جُوَّا كون
حَب وطنه ... صان ترابه
عُمره ما عكَّر شرابه 
لمَّا تكره انت أخوك
تلقى كل الدنيا شوك
تلقى كل الناس سابوك
تلقى طعم الدنيا مُر
اغتراب 
تبقى للعطشان سراب
ألف وردة للى عشش جنب طيره
مامنعشي حد خيره
حَب غيره وأهل داره
أو ماخنشي ف مَرَّة جاره
ألف وردة للقلوب 
اللي لو عشقت تدوب 
اللي بتحب بصحيح 
فيها بلسم للجريح
صامدة ما اهتزت لريح
للوداد دايمًا تصون
طاهرة ما تعرف تخون
أو تضر
جُوّا منها الخير يسر
لمّا يبقى بينا بُغض
ولَّا تار
لمَّا نكره بعض عار
الله محبة 
والحب للمؤمن شعار