الغربة
إيه احساسك ؟!
وانت ف غربة بعيد عن ناسك
زى الطفل خدوه من أمه
زى التايه جوا الزحمه
نفسه ف حضن أمان يضمه
اللى يغيب عن اهل ودار
يلقى الشهد ف بقه مرار
كل هموم الدنيا تغمه
إيه احساسك ؟!
وانت ف غربه بعيد عن ناسك
يااااااه ع الحرقه ف وجع الروح
لمّا بتبعد عن أحبابها
يااااااااااه ع الفرقه ولا مرارها
ياناس وعذابها
فين الشله وفين اللمه؟!
فين الخاله وفين العمه؟!
لمَّا تلاقى نفسك سارح
تلقى الورد ف إيدك جارح
حتى الأنفاس خنقه وذمه
إيه إحساسك ؟!
لمّا حنين الشوق يندهلك
ولاّ انين الذكرى لأهلك
لمَّا بتسهر وانت وحيد
عمرك كله قضيته بعيد
أغلى حبايبك مات ولا شفته
جبت المال من وجعك عفته
إيه إحساسك؟ّ!
عايز تعرف إيه إحساسى
وانا محروم من أهلى وناسى
ياااااااااااااه مآسى
باشرب مُر الحزن ف كاسى
عايز تعرف إيه إحساسى
بص ف ورده تكون دبلانه
بُص ف ضحكة وش يتيم
بُص ف أرض شراقى جفاف
ولَّا عيون ف الليل بتخاف
عايز تعرف ايه احساسى
وانا ف الغربة
وانا محروم م الأهل وقُربة
زى الميت... ناسه سابوه
جوا القبر لوحده ف تُربة
عايز تعرف معنى الكربة
اسأل واحد سافر جرّب
اسأل واحد تاه عن أهله
يوم واتغرّب
اسال واحد كان عطشان
جوّا الصحرا شاف المية
بعيد تتسرّب
ده احساسى
وانا ف الغربه بعيد عن ناسى
باشرب مُر الحزن ف كاسى
باشرب مُر الحزن ف كاسى
