يعني إيه للشاعر راضى على الطهطاوى

يعني ايه مَتْرَضَّعيش 
يا ست هانم غير بأجْر ؟!
يعني إيه الشمس تطلع
بس ليلنا يخاصمه بدر؟!
قولى سعر الرضعة كام ؟!
فورى أدفع ولَّا فيزا
وابني لو واخد زكام
تبقى عايزة الأجرة ميزة
وامتى رايح ينفطم ؟!
لو فلوس أكتر يكرَّع
فوق خدوده يتلطم 
لو فى يوم للشُخْب سَرَّع
لمَّا يبكى لينا ابن 
نغلي أكْل الوجبة تبن
طوا ما أمه عايزة أُجرة 
اللبن راح يبقى جِبن 
قولوا لينا فهمونا
بالعناد ليه توهمونا
امتى ست تراعي بيتها 
راح يقلل منها قدر ؟!
يعني ايه كله بفلوس
كان قيام او كان جلوس
يعني إيه لو مش موافقة 
تبقى عِشرة عليَّا حَجْر 
يعني ايه ماتطبخيش ؟!
تخبزيش.. حتى صحن ماتغسيليش
طاب فى بيتنا ازاى نعيش؟!
طاب لابنك مين يرضَّع؟!
هاتسيبيه يصرخ يهاتي؟!
مين يروح السوق يبضَّع
مين يساعدني ف حياتي؟!
يعني طول اليوم في شغلي
وابقى أُم لوش فجر ؟! 
لو ذاكرتي للعيال .... عايزة مني اجر حصة 
بالدولار ولَّا بريال ... ولو مفلس تبقى قصة 
يعنى لو قطَّعتي كوسة... ..او كويتى ليَّا هِدمة 
ولّا عايز قلبي بوسة ..... يبقى كله بأجر خدمة
طالعة نازلة تقول جنيه
للغسيل تدفع يا بيه 
لِيييه.... 
مين اللي قال مش ملزمة انتي برضاعة؟!
مين اللى قال إني الجواز يصبح بضاعة؟!
مين اللى قال خدمة عيالك فيها من قيمتك وضاعة ؟!
لمَّا جيتي ف بيتي عندى
ليه تعاندي... ؟!
دا الأصول إنك تساندى
فبلاش أفكاركو الهدَّامة ... ع الفتنة ليه كدا بنَّخَّر ؟!
لو قادر أجيبلك خدَّامة.. . مش ممكن عنك هتأخَّر
يعنى الأزواج تطبخ تغسل..والست تنام كدا وتشخَّر 
فين الإحسان ويَّا العِشرة . ولَّا المعروف راح واتبخَّر 
دا الحياة تحلا بتعاون ......... بالتفاهم والهداوة
مش مكايدة أو تهاون ... مش منافسة أو عدواة 
دا الزواج رحمة ومودَّة
مين فى فكرِك جاب وودَّى ؟!
صاحبة الأفكار دى جُرَّة 
رايحة تخرِب بيت أبوكى 
ليه تخلِّي العيشة مُرَّة 
ليه عليَّا سلطوكي؟!
طول ما مخدوعة بكلامهم 
بكرا تلقِي ليكى ضُرَّة
ويبقى ليَّا مِيت مبرر
وان رفضتي راح تلاقى 
ألف سكة فراق وهجر
يعني ايه مَتْرَضَّعيش 
يا ست هانم غير بأجْر ؟!
٤