الغربه وأحوال الناس فيها ناس مرتاحة وناس تعبانة

الغربة  أصعب قرار واقصى حكم   منفى الروح انت بتحكم على نفسك أنك تعيش حياتك غريب فى وطنك الجديد لأن روحك سكنت وسط الناس اللي انت حبتهم وذكرياتك وأيام طفولتك الجميله  ... وغريب فى وطنك الام لأنك وقت ما ترجع تزورهم أنت ضيف وغريب هتلاقى ناس تانية ومجتمع تانى أنت منسي فيه وصورتك مش جواه 
بتعيش حياتك تتفرج على الناس اللي بتحبهم فى صور .. أقرب الاقربون لقلبك يتجوز ومش هتعرف تشاركه وفى ناس أهالينا بتموت ومبتعرفش تودعهم .. وفى ناس عاشت وماتت فى الغربه وحيده محدش حس بيهم ولما جم يدفنوهم مكنش حد بيودعهم وفى ناس بتترمي فى المستشفيات مبتلقيش حد يزورها .. وستات بتولد وهى اللي بتخدم نفسها حتى عيالها مش بتعرف تفرح بيهم 
المغتربين فى منهم اللى مبيعرفش يفرح لان مفيش حد يفرح معاه او يشاركه حزنه ..." الذكريات الحلوة مؤلمة اكتر من الذكريات الوحشة" .... المغترب بيعيش فترة اكتئاب شديد وصدام نفسي مع الثقافة الجديدة اللى بيلاقيها فى وشه ما بين عادات وتقاليد اتربي عليها ومجتمع مفتوح لأقصى درجات الانفتاح وبيقابل مشاكل مع تربية اولادهم  
المغتربين فى ناس دكاتره ومهن انت متتخيلهاش كانوا عليه قوم بلادهم وقفوا غسلوا صحون وحمامات بلاد غربتهم .. فيهم ناس ماحدش اعطاهم خيار تتغرب ولا لأ .. وفى ناس دفعت غربتها فى حاجه ملهاش دعوة بيها وفى صراعات متخصهاش .. فى ناس اتغربت علشان تربى عيالها او مجتمع اجبره على الغربه .. فى ناس شغالة عكس مجالاتها وفى ناس بتعيط من الوجع ومتقدرش متروحش الشغل وفى ناس مش قادرة تقف على رجليها وبتقف ساعات علشان اللي فى رقبتها وناس الراحه بالنسبه ليهم اقصى أمنياتهم 
أوعى لما حد يكلمك عن وجع غربته .. نشوف الردود اللي تشل فى التعليقات على اوجاع الناس وتقلهم : " ربنا يدينا وجع غربتكم او تتنمر عليهم "  لأن الحياة مش عادله ومفيش حد مرتاح و أي حاجه بتاخدها بتدفع مقابلها وثمن " الغربة = غربه " و مفيش حد مدفعش ثمن غربته ، محدش يحكم على حاجة مش عاش فيها ؛ بينطبق عليها مثل مصري  : " الغريب عامل زى اللى رقص على السلم ولا اللى فوق شافوه ولا اللى تحت سمعوه  
ربنا يطمن كل أهل على أبنائهم فى غربتهم ويعين كل  مغترب..
٠