لمَّا يتجوِّز عليَّا
لمَّا يتجوِّز عليَّا
فيها أيَّوا حاجات كتير
فيها أزمة وضرب جزمة
والعاهات تفضل ملازمة
ومش بعيدة راح يلاقي
خاتمة سودة وسوء مصير
..
لمَّا يتجوِّز عليَّا
فيها أيَّوا حاجات كتير
فيها جَرح شعور وكَسْرَة
فيها فعلًا كسْر خاطر
فيها خيبة معاي وحسْرة
والعيال هتعيش مخاطر
وإنِّي هاطلب لنفصال
ينقطع حبل الوصال
ومش راح اندم يوم عليه
ولَّا هاستعطف عينيه
ومش هخاف من أي حاجة
لمَّا ست بجد تغضب
تبقى نار وحرب قايدة
هرمونات العنف زايدة
والكلام مافهش فايدة
استلقَّى يا روميو وعدك
والعقاب فعلًا عسير
لمَّا يتجوِّز عليَّا
فيها أيَّوا حاجات كتير
..
طول ما جابلي واحدة ضُرَّة
يبقى فقري ويبقى نقري
ويبقى ندل ويبقى جُرَّة
وطول ما عبَّى الإنطلاق
طالبة دلوقتي الطلاق
ولو هيرفض يبقى خلع
والمحاكم والقضايا
يجي يتمنى ف رضايا
يقول دي غلطة واعفٍي عنِّي
خلي في البُعد التأنِّي
دا انتي حب الأولاني
ساكنه ف القلب الكبير
..
مش هسامح
وقلبي مش راح يصفى ليه
مش هافكَّر لحظه فيه
طول ما نقَّى حد غيري
طول ما أنكر فضل خيري
وكنت طاعة ليه وسمع
مهما قادلي إيده شمع
مهما يبكي بنزف دمع
سَد نفسي وقلبي كرهه
والقرار ويَّاي أخير
دا انا كنت مُناه وهناه
كان يوصف فيَّا بمدح غناه
فبقيت الخايبة والعايبة
ويقولِّي عجوزة بقيتي شايبة
مش عاجبه شكلي ولا أكلي
ويقولِّي يا جايبالي مشاكلي
وبقيت ف عينيه النكدية
وف حقه إهمال تقصير
..
شاف كل الخير وعمار على وشِّي
جاي يخرب بيتي ويهدم عشِّي
دا قليل الأصل يا ناس غدَّار
بيجيب الزيت ليه جنب النار ؟!
دا هانشِّف ريقه ف صبح وليل
ومراته الثانية تشوف الويل
وهاخلِّي العيشة بتاعته مرار
وهازوِّد همُّه مع غمُّه
ويسوقلي ف خاله مع عمُّه
ويشوف العين الحمرة
هينام ع النار والجمرة
مش رايح يوم يتهنَّى
وهاخلِّي النوم من عينه يطير
لمَّا يتجوِّز عليَّا
فيها أيَّوا حاجات كتير
