أيَّوا باحب للشاعر راضى على الطهطاوى

أيَّوا باحب 
أيَّوا باحب
وامتى الحب يا ناس كان عار؟! 
من غير حب قلوبنا تموت 
زي جريد النخل تجف
تدور ع الفاضي ياناس وتلف
تنبض بس ما فيها مشاعر 
وتُّوه جُوا الكون تحتار
من غير حب
نعيش الضلمة عز نهار 
جينا ....بِعِدنا...
قولنا وعيدنا
عمر ما كان الحب بإيدنا
لمَّا تلاقي شبيه الروح
زيَّك.. 
ضيًّه تمام بيشابه ضيَّك
وتلقى قلوب عشقت بعضيها
مين لنصيبه يا ناس يختار
..
لمَّا تقابل بدر منوَّر يملا حياتك نور
لمَّا تقابل توأم روحك ويخليك مسرور 
لمَّا القلب بشوق يتعلَّق
ورد يفتح بعد جفاف 
لمَّا تحب وتلقى لهيب الشوق بيهب 
تهوي حياتك..تعشق عمرك 
بعد ما كان حلمك منهار
أيَّوا باحب 
وكلمة باقولها بعلو الصوت 
فخور متفاخر 
اصل حبيبتي جمال م الأخر 
هايم بيها وباوصف فيها 
وباكتب ليها كمان أشعار 
ايَّوا باحب
وامتى الحب يا ناس كان عار ؟!