قصيدة من ألف قصيدة للشاعر : راضى على الطهطاوى

ازرع قلبك كله محبة.........ازرع كل القلب حنان
املا حياتك خير وتسامح…..تلقى جناين ورد تبان
ابدأ خطوة ف درب طريقك ..ضحكة وشك ضي بريقك
خلِّي عبير يفوح من سيرتك .. رشرش فرحة ف كل مكان
اوعى البسمة تفارق وشك.… اوعى البهجة تهاجر عشك
افتح سكة لكل طموحك..... اقفل للتكشيرة بيبان
انسَّ الماضى وكل جراحه .....حبل الود ادِّيله براحه
اكتب بالألوان على سطرك. ارسم حلم بإيد فنان
..
اغنم كل ساعات الحاضر...مَلِّي عينيك م الورد الناضر
خليك صاحي لدق الساعة .....إياك تدِّى العمر أمان
مهما الشمس تغيب هتهل......والأنهار للصحرا تبل
أمنياتك راح تتحقق .......بس الفرحة دا ليها أوان
..
خلِّي الطير فى سماك بيغرَّد ..لحن هواك بالشوق متفرَّد
وافرد للأحلام جناحاتها...... سيب لحصان الخطوة عنان
ربك شايف كل حمولك....صِدق عزيمتك يمحي خمولك
تلقى نشيد الحب غناويه..... ودَق القلب موسيقى كمان
..
اوعى اليأس يقرَّب مِنَّك....اوعى الشيب يبان على سِنَّك
خلِّي الطاقة تشع بريقها ....غنوة فرايحي بصوت رنَّان
سيب الحلم يقول غناويه….. واعزف ليه بالناي ولاغيه
يغمر نور الصبح ملامحه....سيبه يطير زى الغزلان
...
دوس على حزنك سمِّى وعدِّى .اوعى الفكر يجيب ويودِّى
طول ما الروح ويَّاك متفائلة..تلقى الضحك عزف ألحان
ابدر كل البهجة بإيدك....... ربك من أفضاله يزيدك
بستانك بالحب يخضَّر...... تفضل عطر ف كل زمان
ازرع قلبك كله محبة......ازرع كل القلب حنان