للشاعر راضى على الطهطاوى كيف تروِّض مديرك؟!!!
..
وسَّع طريقه....كظله ورافقه
وشجَّع فريقه. وامدح ونافقه
توافقه
واعرف خصومه ....حبيبه دا مين
وبالغ فى وصفه بانه مميز
ريادة وتألق وعفَّة ورزين
وقوله ياباشا يا سكر بغاشة
يا مبدع خبرة
بناخد جنابك مثالنا عبرة
دا انت الجدارة وانت الصدارة
ومين اللى زيَّك في فن الادارة
مكانك حقيقى فى اعلى المناصب
ومين اللي غيرك ينفع وزير
يا هادي وطيَّب
يا غالي يا عالى
يا أجمل مدير
..
وان كان عازب قوله يا نجم
عندي عروستك جاهزة ولقطة
هتجيب للرافضاك دى نقطة
لو يتنرفز ادخل هدِّي
قوله ياباشا
لجل الصحة بتاعتك عدِّي
وفخِّم سعادته
وافهم طبيعة سلوكه وعادته
واسأل عنه ف يوم إجازاته
والبس اسود رووح جنازاته
واسال دايمًا عن أولاده
توتو و حمادة وسلوى وعبير
..
واحضن وبوسه وعظِّم سلام
ونعِّم فى صوتك وخفف كلام
وقوله مدبرنا حبيبنا وكبيرنا
منوَّر مسيرنا وسرَّك في بيرنا
حتى ف زعيقك
زفيرك شهيقك
وضحكة سنانك
تمام التمام
وامدح فى أناقته
واتكلم عن فن الحكمة و لباقته
تاخده على جَوُّه وعلى شوقه
توصف فى جراءته مع ذوقه
وف عيد ميلاد هاتله هديَّة
وادِّي العيال أحلى عيديَّة
خليك حاسس دايمًا بيه
قبل مايعطش اجري اسقيه
هاتله البخور كدا ف المكتب
من كل حاسد كدا وارقيه
وسجارة لو كان بيدخن
حاجة م النوع إلْ بيسخَّن
خلِّيه يحس معاك بأمان
يعشق هواك زي الإدمان
وتعيشله دور العصفورة
تنفخ وتبالغ وتقوله
مين زيَّك؟!
يا ضمير ونزاهة
يا حنيِّن يا ابو قلب كبير
يا طيِّب وهادي
يا غالي يا عالى
يا أجمل مدير
