عرق الجبين

تحية للمكن اللى داير 
واللى دم عزيمته فاير 
واللى ف المصنع بيعرق
يغزل الإنتاج ستاير 
مصر رايحة تبقى جنة
لمَّا نصبح مخلصين
..
تحية للشخص اللى بانى
واللى عمره ما كان أنانى 
بالسواعد جه وعمَّر
ولا فلاح وشه سمَّر
زارع اللقمه بإيده
كلنا نفرح بعيده
دا الكسل يهدم يدمَّر
والعمل زينة الجبين
...
مصر بجهود الولاد
تبنى قصر المجد تاج
تلقى زرع الخير نتاج
لمَّا نعرق كل ثانية ف الدقيقة
حلمنا يصبح حقيقة
لمَّا مصرى صوته ينده
تعرف الدنيا دا مين 
....
ف البرودة والحرارة
ناس بتصنع ف الحضارة
بالمهارة والجدارة 
نبقى بالتأكيد صدارة
نلقى خيرنا بين إيدينا
حلمنا يصبح يقين
...
ناس تخضَّر ف الرمال
واللى بيشق الجبال
والى بيعلم رجال
والمصانع والورادى
واللى بيهندس فى وادى
تسلم الهمة وأيادى
والوشوش العرقانين
...
دا العرق سر الحياة
يصنع مهابة ويبنى مجد
دا العمل فرض وعبادة 
حصن ضد الفقر سد
ألف بوسه فوق جبينكم 
ألف شكر كمان بجد
ولا ست عشان بلادها
بالكفاح تصنع ولادها
واللى حامى يا ناس حدودنا
والعيون السهرانين
مصر رايحة تبقى جنة
لمَّا نصبح مخلصين
..