أمى

هاحكى ايه ولاَّ ايه؟!!!
هاحكى عن تعبك فى حملى
ولاَّ كبدك كان وسادة
ولاَّ ترفيسى فى بطنك
ولاَّ أنفاس الولادة
ولا طول سهرك فى ليلك
شغل يهلك ألف دادة
ولاَّ دمعك لمَّا سال
فط قلبك وانخلع
لمَّا شوكة جات فى صابعى
عشتى مرجومة ف هلع 
وشك الموت بان عليه
هاحكى ايه ولاَّ ايه؟!!!
....
لمّا باجرى فى الجناين 
قلبها يحرس يعاين
لمَّا بالعب فى النوادى
كل لهفة وشوق ينادى
لمّا أغضب باحتدادى
قلبها يطبطب يدادى
لمَّا أسهر مرة برة
من قلقها عليا تزعل
مرة تعتب أو تخانق
كنت احس كلامها خانق
بس برضه تراضى فيا
بكلمة حلوة وابتسامة
يا ابنى بتوغوش عليك
يا ابنى بتوحش عينيك
ألف حمد على السلامة
اوعى يا ابنى تنام بجوعك
ولاَّ تزعل م الملامة
ياااااه ..
لسه فاهم بس يا مه
إنى قلبك كان عليا
وللمحبة ميت علامة
قلب مخلوق للمحنة
واحنا نقسى كتير عليه
هاحكى ايه ولاَّ ايه؟!!!