لا للإنتحار

.من ديوان حلم بيفرد جناحاته 
العمر مش بَعزَقة ............ ولا عُمره يبقى هزار
جايز فى يوم تنكسر .......... أو حلم ليك ينهار
غرقان فى بحر هموم .......... والكل فيك بيلوم
مها الضلام بيحوم .............. حتما بيجي نهار
..
العمر مش بعزقة ............ ولا عُمره يبقى هزار
إياك فى يوم تتهز ........... إياك فى يوم تحتار
مهما يضيق الحال ........... ولا فيه سبيل للمال 
شايف الفرج دا محال ..... . ربك رحيم ستار
...
العمر مش بعزقة ............ ولا عُمره يبقى هزار
اوعى الحياة تحبطك ...... ضعفك هزيمة و عار
مهما الطموح يتهد ............ حبل الضباب اتمد
شايف الطريق متسد ......... أخر الدروب أنوار 
..
العمر مش بعزقة ............ ولا عُمره يبقى هزار
اقفل بيبان اليأس ............... خلِّي الأمل أشعار 
لوخاصمك فى يوم الفرْح ... ساكن حشاك الجرْح 
ما لاقى لحزنك شرْح .......... صبرك سند وجدار 
..
العمر مش بعزقة ............ ولا عُمره يبقى هزار
عمرك بإيد ربك ................. توقيت وليه أسرار 
لو جه عكار للموود ............ صابك ملل وجمود 
الصبر ويَّا صمود ............ تلقى الجفاف أزهار 
..
العمر مش بعزقة ........... ولا عُمره يبقى هزار
الدنيا زي البحر ................. تقلب صفا وعكار 
لو خط يوم التوى .... أو جه شيطان ليك غوى
ذِكر الكريم دا دوا ............. يملا القلوب بعمار 
...
العمر مش بعزقة ............ ولا عُمره يبقى هزار
عُسر الحياة مع يسر ........ شهد وكاسات بمرار
تعِب الجسد يوم جاع ....... أصل الحياة أوجاع 
خليك بطل وشجاع ...........ليه للرحيل تختار؟!
العمر مش بَعزَقة ............ ولا عُمره يبقى هزار
..