أمي شعرها شاب في 3 أيام.. ابنة مديحة كامل تكشف سر اعتزال والدتها المرعب وقصة الحجاب
حلت السيدة ميرهان الريس، ابنة الفنانة المعتزلة الراحلة مديحة كامل، ضيفة على حلقة اليوم من برنامج “الستات” المذاع عبر قناة النهار، حيث حاورتها الإعلامية سهير جودة، لتكشف كواليس لأول مرة عن حياة والدتها.
*اللحظة اللي غيرت كل حاجة*
تحدثت ميرهان الريس عن كواليس اعتزال مديحة كامل قائلة: “كانت بتعمل مسرحية مع الفنان الراحل سعيد صالح، وكانت في نفس الوقت في فيلم بوابة إبليس. جدتي والدتها كانت أحلى منها، وجالها جلطة في المخ، والست الجميلة دي خلال 3 أيام شعرها بقى كتانة بيضة وجسمها اضمحل، ساعتها ماما جالها صدمة وحست إن كله زائل، وده خلاها تعيد تفكيرها مع نفسها، وخدت قرارها بالاعتزال والتفرغ لدراسة الدين والتقرب من الله”.
*حياتها بعد الاعتزال*
وأضافت ابنة مديحة كامل: “بعد الاعتزال كانت بتقرا خواطر الشيخ الشعراوي، وتحضر دروس الدكتور عمر عبد الكافي وتسمع الشرايط بتاعته، وكانت بتقرا في الفقه والسنة والشريعة دول أكتر حاجة، غير القرآن الكريم وتفسيره”.
*حقيقة الحجاب*
ونفت ميرهان أن تكون قد ضغطت على والدتها لارتداء الحجاب قائلة: “أنا وهي عملنا عمرة مع بعض قبل الحجاب بكتير، هي اتحجبت الأول سنة 1991، وقالت لي لازم تتحجبي، قلت لها لأ أنا عندي شخصيتي مش همشي وراكي، زي البنات في السن ده، وبعد شهرين أنا اتحجبت”.
*السبب الحقيقي للوفاة*
وردا على سؤال عن سبب وفاة مديحة كامل، قالت ميرهان الريس: “سنة 1988 جالها روماتويد ومشيت على كورس علاج وكانت بتمثل وتشتغل عادي، وفي 1992 أول 1993 الروماتويد عمل مية على القلب، واتعالجت بكورتيزون تخنها، وقعدت 6 شهور تعاني وخفت والقلب رجع سليم، والسنة اللي بعدها حجت مع أبوها وكانت بتخدمه. مفيش ورم ومفيش لندن، هي زي موضة الثمانينيات عملت تحاليل وطلعت زي الفل، وتوفيت فجأة بهبوط حاد في الدورة الدموية”.
