حين يختبر الصمت قوة الإنسان بقلم : نشأت البسيونى
في اللحظة التي يسكت فيها العالم من حولك ويختفي صوت الناس وضجيج الأيام وتختفي الوعود والخذلان والانتظار يبدأ الصمت يكشف لك حقيقة لم تنتبه لها طوال الطريق الصمت مش بس غياب الصوت الصمت حضوره أعمق من كل الكلام الصمت مرآة بتعري القلب من أي تزييف وتعري الروح من أي خداع وتخلي الإنسان يقف قدام نفسه بلا دفاع ولا مبررات ولا أقنعة في الصمت
تعرف إنت مين وتعرف مين اللي كان جنبك ومين اللي كان جنبك بالكلام بس وتعرف إن اللي يحبك فعلا مش بيحتاج صوت عالي عشان يظهر ولا ظهور مستمر عشان يثبت وجوده الصمت يكشف المسافات اللي بينك وبين الناس اللي كنت فاكرها قريبة ويكشف إن في ناس قربها كان ضوضاء أكتر منه وجود وفي ناس كانت هادية لكن وجودها أثقل من ألف كلمة الصمت مش ضعف زي ما ناس
كتير تتصور الصمت قوة قوة إنك ما تتسرعش قوة إنك ما تنزلش لمعارك مالهاش قيمة قوة إنك تعرف إن الرد أوقات خسارة وإن الانسحاب مش هروب لكن حفاظ على نفسك الصمت مدرسة من غير أبواب تكشف لك الدرس قبل ما تطلبه وتقول لك إن اللي راح مش خسران واللي فضل مش عبء وإنك مش محتاج تصرخ عشان تثبت إنك موجود ولما يختبر الصمت قوة الإنسان يعرف إن اللي
واقف جواه أقوى من أي صوت بره وإن اللي بيزعق دايما مش قوي اللي قوي فعلا هو اللي يعرف يسكت ويسيب الزمن يتكلم ويسيب الحق يظهر بدون ما يجرح ويسيب الكرامة تقول اللي مش قادر يقوله اللسان الصمت يعلمك تنتقي ردودك وتختار معاركك وتشوف حجمك الحقيقي بعيد عن كلام الناس ورأي الناس وأحكام الناس
وفي عز الصمت تعرف إن الراحة مش في البعد ولا في القرب
الراحة في إنك تكون صادق مع نفسك وإنك ما تجبرش قلبك على وجود حد مش شايفك وما تمنحش ودك لحد بيستسهل غيابك وما تحاربش عشان شخص بيحاربك أو بيستكتر عليك كلمة كويسة الصمت يقول لك إن اللي مش قادر يحافظ عليك مش هيعرف يفهمك وإن اللي ما يشوفكش وقت هدوءك ما يستحقش يشوفك وقت انتصارك يبقى الصمت مش نهاية لكنه بداية بداية قوة جديدة
بداية وعي مختلف بداية إنك تشوف كل شيء بوضوح بعد ما كنت بالأصوات اللي حواليك البداية اللي تعرف فيها إن أقوى خطوة ممكن تعملها إنك توقف الكلام وتسمع اللي جواك لأن اللي جواك أصدق ألف مرة من أي كلمة جاية من بره الصمت عمره ما يكسرك الصمت يرممك يعيد ترتيبك ويخليك تفهم إن قوتك مش بصوتك لكن باتزانك ووضوحك وراحتك
