قصيدة للشاعر راضى على الطهطاوى

جمال عبد الناصر
عاش حياته و كان مناه .....للوطن يعزف غناه
ربنا قوى ف عزيمته ..........للبلاد أمم قناة
شاف الفلاح كان مقهور 
محروم من خضرة ومن بور 
خدله من الإقطاع كدا حقه 
واداه أرض ومكنة تدور
.. 
كان يهتف بالصوت ويسمع
يلا يا وطني العربي اتجمع
رغم حروبه مع صعوباته
يبني ف كل مدينة مجمع
كان أسطورة حقيقي بجد.......شد جسور السلم ومد
رغم الضيقة مع التكاليف..........قرر فعلا يبني السد
والبنك الدولي بيتشرَّط
يربط حبله عليه ويقرَّط
رغم الضغط عليه كان صامد
قال ف كرامة بلادي مافرَّط
..
ألف تحية إليه وزهوري 
قالها صريحة بصوته جهوري 
الدستور و حقوق المرأة
من ملكية بقت جمهوري
حقق ميت مليون إنجاز .....نهرو وتيتو رفض ينحاز
ويضمد ف جراح النكسة......كان في الخطبة بليغ أستاذ
...
شاف محتل عايز تفريقى......يحفر بحر فتن تغريقي
والمغرب وجزائر تشهد.......حررنا الشعب الإفريقي
خلي التعليم صار مجاني
و عمود نور ف الشارع جاني
هاكتب عنه وعن أفضاله 
مهما غريب يشتم وهاجاني
ونسيج غزل ولبس محلة.....والزرعة بتطرح بالغلة
و الدهب الأبيض وخيوطه.....لقمتنا بسكر تتحلى
.. 
أسس جيش مخلص لبلادنا ....أحمد مينا و دوول أولادنا
شوفوا إيلات مع راس العش.....حط الخطة بنصر وعدنا 
..
كان الشرق صراع معتل ...والعالم ف حروب مختل 
كافح.. حقق.. عيد وجلاء..لازم يمشي غريب محتل
بنى ماسبيرو مع الإذاعات 
راديو القرآن كل ساعات 
و كنيسة للبابا كيرلس
والإنتاج فخر الصناعات
....
بيجلوه عظماء وأفاضل
مات وتاريخ بعديه عاش فاضل
كان راسم حلم القومية
كان عايش للوحده يناضل 
كان لستعمار ليه بيحاصر ...علشان كان لعروبته يناصر 
شنوا العدوان غدر ثلاثي........لازم نكسر عبد الناصر
لو نحكي ف تاريخ من تاني
على حس جمال الإنساني 
يا سلام يا جمال عبد الناصر
الذكري بتعزفله أغاني