الشاعر راضى على الطهطاوى من ديوان شرخ في جدار الروح غلاء المهور

ليه بنغلِّى الشبكة ومهر 

وحاجة تهد الحيل و الضهر

ليه نحرم أولادنا الفرحة ؟!

ونعيش طول العمر ف قهر 

..

رايحين عند الصايغ زيطة

علشان خاتم شبطة وعيطة

والعرسان تزعل تتنكد 

وجوازة تصبح لخبيطة 

..

ليه يا عريس تجري وتتفاخر ؟!

تحجز قاعة ف فندق فاخر

مهما تجيب بديون وتكلِّف

برضه هتلقى اللوم من ساخر 

..

ليه العفشة تسد طريق؟!

ميت عربية بزحمة وزيق

ونجرَّح للناس ف شعورها

ونعطِّل إسعاف لحريق 

..

ليه النيش مفروض كدا فرض؟!

ميت فنجان مرصوص ف العرض

لبه بتقلٍّد بس فى غيرها ؟!

وابوها مديون بالقرض

...

والنسوان بترُص تعبِّي 

من ورا جوزها تجيب وتخبِّي

عايزة توري الحارة وجارة

والراجل مجبور هيلبي

...

يمشي الزين على كد خطاه

دا الناس عارفة البير وغطاه

مش لازم تقسيط وديون

بكرا يجيب لو ربه عطاه 

.

ليه بنخلِّي جواز يتعسَّر ؟!

والأولاد تزعل تتحسَّر

فبلاش بس نجيب ونبالغ

حلوة الفرحة لو تتيسَّر.