قصيدة {أنا طفلة }
انا بنتك
انا طفلة ما بين ايدك
حروفها تصب في وريدك
فهذب لي صروف طبعك
واحساسك
صحيح مخلوقة من ضلعك
لكن نفسي
تشيلني حواية فوق راسك
انا طفلة
وباتنرفز وباتعصب وباتضايق
وصوتي يرن ويلالي
وادبدبلك برجليا
دقيقة ويتقمص حالي
اروح اتخبى ف مخدة
على سريري
قوام يتشل تفكيري
والاقي دموعي
بترجملي تعبيري
مانيش مرأة حديدية
ومش جامدة ولا قوية
ومش شخصية جبارة
انا باتهز لاشارة .....ولعبارة
وكلمة تجيبني وتودي
فايه يمنع يكون ودي
دلع منقوش مدادية
تغلفها ....أبوة روح وحنية
انا طفلة
اقلها شيء بيرضيني
ويسعدني ويغنيني
اقوم ارقص واغني لقلبي ع الدقة
واموت واسمع جمل معجونة بالرقة
ترن الضحكة في الشقة
بصوت عالي
واجري عليك بشوق وحنان
وتبقى لجنتي رضوان
وتصبح لي ملك
وانا تاجك الغالي
ماتحسبهاش يانور عيني
حاجات ببلاش تكفيني
كإنك جبتلي الدنيا
ف كف ايديك
وتمشي المركبة سهلة
لإني بنتك الطفلة.....
كتيرة عليا !!!!
كبيرة عليك!!!
