طريقة عمل المخللات

مخلل البصل

احلى مخلل بصل ينفع للتخليل الابيض القورمة الصغير جدا بس ممكن برضو ببصل عادى مش هيقول لأ

- البصل بيتخلل بقشره مع مية وملح كتير من غير خل 

- بعد اسبوع او اتنين تقشريه وتغسليه و تحطى عليه مية وفصيين توم سليم و شطة وممكن تحطى فلفل اخضر وعود كرفس وبشر جزر و ملح و لو عاوزة احمر حطى حتة بنجر وبعد اسبوعيين هتاكى احلى مخلل

- اوعى تسمعى كلام حد يقول زودى خل ده كلام غلط لأن الخل بيهرى المخللات لو قعدت فترة طويلة

* مخلل الكرنب

الكرنب المخلل مابيتسلقش

- بتجيبى الكرنبة وتقطعيها بالسكينة بالطول والعرض كدة وتنزلى عليها بالسكينة تخليها بقى شرايح او عريضة براحتك

- بتحطى الكرنب فى برطمان وعلية مية وملح وشوية سطة حمرا وبعد يوميين تاكلى احلى مخلل كرنب

- ممكن تحطى الكرنب مع اللفت عادى

* مخلل اللفت

- تشيلى القشرة الخارجية الى على اللفت وتقطعية وتغسلية وتحطى علية ملح على 

- تسيبى بقى اللفت يوم كامل لغاية ماتلاقية نزل كل المية بتاعتة المر دة

- تصفى اللفت من المية الى نزلت منة 

- تغلى مية وتسيبيها تبرد

- تحطى بقى اللفت فى برطمان وتحطى علية مية وملح وشوية شطة حمرا ومعلقة سكر وفصيين ثوم متقطعيين ولو عاوزة لونة احمر حطى حتة بنجر معاه او اكتر على حسب الكمية

- ممكن تحطى معاه كرنب متقطع من غير سلق

* مخلل القرنبيط 

القرنبيط المخلل مابيتسلقش

- تنضفى القرنبيط وتفصصية وردات صغيرة وتغسلية

- تحطى القرنبيط برطمان و عليه الثوم متقطع وفلفل الأخضر والملح و شوية خل صغيرة و ممكن تحطى جزر مبشور براحتك وحتة بنجر لو عاوزاة احمر

- حطى بقى علية المية وسيبية اسبوع هيستوى لوحدة ان شاء الله

* مخلل الجزر

جزر نغسله كويس جدا و نقطعه صوابع

ملح 

فلفل اخضر او احمر حامى 

شطه 

معلقة كبيرة سكر  

فصين توم 

تفرمى فى الكبة الفلفل الحامى مع التوم و تحطى عليهم الشطه و الملح و تحطيهم على الجزر المقطع صوابع فى البرطمان و تكملى بقى بالميه و ترجى البرطمان و تسيبية حوالى من اسبوع الى 10ايام

* مخلل الليمون المسلوق

ليمون

ملح

وفلفل اخضر حامى

عصير ليمونه

كيلو الليمون بياخد تقريبا ربع كوباية ملح 

- تجيبى حله و تحطى الليمون و تغطية بالميه و تسيبى الليمون يتسلق على النار يادوب غلوتين و تصفى منة ميه السلق و تغسليه بالميه و تنقعية بقى فى ميه جديدة و تغيرى الميه يومين علشان المراره اللى فى الليمون تطلع كلها زى الترمس كدة

- تجيبى البرطمان بتاعك و تحطى الليمون ومعاه الفلفل الاخضر الحامى بعد ما تغزية بالسكينه من جمب غزه كدة وعليه الملح وبعدين تعصرى علية الليمونه على الوش و تزودى مية و تحطى الملح والخل و شوية زيت على الوش وتقفلى البرطمان 

* الليمون المعصفر

- تسلقى الليمون نص سلقة دقيقتين كدة يادوب غلوة واحدة زى الترمس كدة و تنزلية من على النار وتسيبية يبرد وما ترميش مية السلق 

- تجيبى عصفر و حبة البركة شوية صغيرة علشان لو كتير الليمون هيغمق و ملح و شطة و نشق بالسكينة كل ليمونه شقة صغيره و نحشيه من جوه بالخليط دة تقريبا معلقة كبيره لكل ليمونة و ترصية فى برطمان راق ليمون وراق عصفر وحبة البركة وراق فلفل اخضر وهكذا و الباقى من الحشو نحطه فى مية السلق و تملحيها كويس و تحطيها على الليمون و تغطية بقى بشوية زيت 

* مخلل الخيار والفلفل

خيار

ملح

ثوم مفروم

ثوم سليم يادوب تخلصى من القشرة الخارحية بتاعتة

معلقة سكر علشان الخيار يفضل مقرمش زي بتاع المحلات

شطة 

فلفل

- تعملى التتبيلة ملح و تحطى عليهم الثوم سواء مفروم او متقطع عادى ومعلقة سكر و قرنين فلفل بس تشقى الفلفل شقة صغيرة كدة

- تحطي الخيار فى البرطمان وتحطي علية التتبيلة دى وعلية المية وفصوص الثوم الى بقشرها وترجى البرطمان بايدك كدة 

- تجيبى كيس وتغطى بية البرطمان قبل متقفلي البرطمان علشان الهوا ميدخلش للبرطمان و متتكونش طبقة بيضاء

- ممكن تحطى الخيار فى شرش جبنة وتاكلى منة تانى يوم

- ممكن تجيبى الخيار وتشوقية اربعة كدة لاقبل الاخر بشوية من غير ماتقطعية وتحطى فية التتبيلة وتحطية فى علبة من غير مية ولا اى حاجة هينزل ميتة وتاكلية بعد ساعة

* مخلل الطماطم

- تجيبى الطماطم تقطعيها شرايح عريضة 

- تحطى التتبيله الى عملناها للخيار

- تحطيها فى طبق وتسيبيها ربع ساعة وتاكلى منها بالف هنا

* مخلل البذنجان العروس

بدنجان عروس

فلفل احمر

ثوم متقشريهوش يااادوب تفركية بايدك وتنفضى القشرة الخارجية بتاعتة بس

ملح

شطة

تضربى كلهم فى الكبة

- تجيبى البدنجان تشيلى منة العنقود من غير ماتقطعية وتسلقية وعلى حسب مدة الحفظ هتكون مدة السلق يعنى لو هتاكلى منة على طول هتسلقية عادى ولو هيفقعد معاكى شهر تسلقية نص سلقة ولو عاوزاة يقعد ماعكى سنة يااادوب يلمس المية غلوة واحدة او من غير سلق خااالص

- تشقى البدنجانة شقى بالطول من غير ماتفتحيه قوى وتحطى الحشوة بتاعتك

- ترصى بقى فى البرطمان وتحطى مية وملح والباقى من التتبيلة دى