طفل الشارع
طفل الشارع قلب حزين
برد وحر ودمع أنين
مُوجَة تشيل ومُوجّة تحط
واللى بينتر فيه يشخط
طفل برئ محتاج لعلام
نظرة عينه عتاب وملام
ليه سايبينى ف بحر التوهة؟!
فين الرحمة معاكو ودين
فين قلوبكوا يا بنى أدمين؟!
...
منكوش شعره تلقاه حافى
ليه بتقسى الناس وتجافى؟!
حتى الأكل معاى متلوِّث
جرح مقيـِّح حلم مسوِّس
ناس بتبص وكله شايفنى
بس قلوبكوا ما فيها حنين
فين قلوبكوا يا بنى أدمين؟!
..
عصفور بس ما لاقى العش
كله بيقسى علينا يهش
حزن مواجع رمز تخلـِّى
قلب فواجع تهمة تبلـِّى
لو سيبتونى رايح أبقى
زرع عداوة ف طرح سنين
فين قلوبكوا يا بنى أدمين؟!
...
يا طفل الشوارع يا عتمة دروب
يا أسرة اللى سابت دورها بهروب
وأيام بتحبل شروقها غروب
كل ما باكبر
نصبة عودى معاى تتهد
بالقى الغربة طريقها اتمد
لون الضحكة ف وشى دا داكن
أنا عنوانى التوهة وساكن
واللى ياخدنى بيته يذل
يزرع فينا الإجرام غل
وساعات ضرب كمان وإهانة
وجوا الدنيا ما لينا معين
فين قلوبكوا يا بنى أدمين؟!
..
مخلوق زيَّك طاب ايه ذنبى
ياما شايفنى وبتفوت جنبى
عمرى ما شفتك يوم متأثَّر
كله ف حقى ياناس بيقصَّر
دا احنا ضحية
بس الجانى علينا دا مين
فين قلوبكوا يا بنى أدمين؟!
..
