١٩ نوفمبر اليوم العالمى للرجل
كان اليوم العالمى للرجل هذا الكائن الجميل البسيط الغلبان ، اللي طموحه بيبدأ عند كنبة الانتريه مرورا بطبق الفاكهه فنجان القهوه انتهاءا بالتليفزيون و الأخبار ، الكائن الهادي اللي مش عايز حاجه من حد ولا عايز حد يعوز منه حاجه ، الكائن المقهور اللي ضيع طفولته ومراهقته في التعليم علشان يكبر ويشتغل ويضيع الباقي من عمره شايل حمل ناس تانيين ولا فارق معاه ولا بينزل حظه على كده ، الكائن الغلبان اللي نص يومه بيروح في الشغل علشان يقبض اخر الشهر فلوس يطلعها مصاريف بيت و مدارس و جامعات واقساط وديون ، الكائن الواضح الدغري اللي كلامه واضح وافعاله واضحه وتفسيرها سهل ومش محتاج مجهود علشان يتفهم ومحدش بيهتم يعرف هو عايز ايه، و مطلوب منه هو اللي يهتم بالآخرين ، الكائن اللي عنده المكرونه زي المحشي زي السمك زي اي حاجه المهم المعده تتملي والبطن تتنفخ شويه وخلاص ، الكائن الغير مُعقد اللي بيجيب اي حاجتين تلاته يحطهم علي بعض يلبسهم ويمشي الدنيا ومبيقعدش يتفنن كل شويه يلبس ايه و يغير ايه ، الكائن اللي مش عايز يعرف جيرانه قالو ايه وعيلة امه عملو ايه وعيلة ابوه اشترو ايه وزمايله اتجوزو مين واصحابه اتطلقو ازاي ، الكائن اللي بيسمي الاشياء اسماء واضحه ومعروفه الكوتشي يعني كوتشي والجزمه يعني جزمه والقميص يعني قميص الابيض يعني ابيض والاحمر يعني احمر والازرق يعني ازرق ، الكائن المقتنع وراضي بشكله ولون شعره ولون عيونه ويوم مايفكر يتجمل بيجيب معجون اسنان بكم جنيه علشان يحول اسنانه من اللون الاصفر للون الابيض ، الكائن اللي بيعامل الناس معامله دغري مابيدورش علي ابراجهم واتولدو في الصيف ولا الخريف وطبيعي ولا قيصري علشان يقرر هيعاملهم ازاي ...
المفاجئه اللي كنت سايبها للاخر ، ان الراجل مابيقولش انه نص المجتمع وانه الاب والاخ والزوج والصديق لان ده طبيعي مش محتاج فكاكه يعني
