شعب واحد من ديوان ..جلا جلا

ازاى شمس الحب تغيب؟َ! …. رمز الوحدة هلال وصليب

احنا الشعب الأزلى الأوحد……. عنده شعارالحب نصيب

مركب ماشيه لبر أمان…..... موسى محمد عيسى حبيب 

شوف الحب بألوان ثابتة…......… لو فنان أو كنت أديب

ياما حاسد حاول يفتن……. باب الحب ما فيه تسريب 

عايز ينخر جوا نسيجنا…….. زى السوس بسم دبيب 

اسأل كل تاريخ هيقولك… مصر حاميها المولى رقيب

أحمد لو ينده هيلاقى….. جرجس جاله بسرعه مجيب

واحد يصرخ آه م الشوكه….. يلقى الحضن الدافى قريب.. 

لمَّا الروح تتنفس حب…… يبقى إزاى يفتنها غريب؟!

مهما يحاول يأذى بلدنا….. شاف وحدتنا شعره يشيب

شاف الجامع جنبه كنيسة….. طوبة بطوبة بشكل عجيب

أََقسَم إنى دا شعب موحد …….مش راح ينفع فيه تجريب

ربك كاشف كيد الخاين……. مهما حاول غدره يخيب

ثورة سعد أكتوبر يشهد…… لو كان عندك شك مريب

لمَّا الناس تبعد تتفرق ….. ..إيد الشر أكيد هتصيب

رايح تبقى ضعيف متعرى.. زى فريسه ف وش الديب  

خلى قلوبنا على بعضينا ……..نعزف لحن الحب طريب

لون الدم ترابنا ونيلنا….... لو فيه جرحْ الحب طبيب

ازاى شمس الحب تغيب؟َ! …. رمز الوحدة هلال وصليب