ملك الموت بقلم :- الشاعر راضى على الطهطاوى

يجي يزور الناس على غفلة
كنت ف شركة ف سوق أو حفلة
من غير إذن معاه تصريح
مهما تكون أبوابنا دي قافلة
..
يجي بدون سابق إنذار
لا بيعرف واسطة ولا هزار 
لا يأخر ثانية ولا يقدِّم
ولا يقبل ابدًا اعذار 
..
مهما العمر يطول هنقابله 
رافضه الإنسان كان أو قابله 
وساعات يبعث ليك دلالات
تيجي الشعره البيضة دى قبله
..
مُر الموت فرقة أحباب
ساعه يكون للموت أسباب 
ازاي امتى ما نعرف فين
واللى يموت في الغربة شباب
..
ملك الموت ما يخاف من حد
مهما العمر سنين تتعد
طول ما وِلدنا أكيد هنموت 
مهما حبالك نوح تتمد
..
فيش في الموت فصال ومهاترة
ولاَّ عزيمته تكون يوم فاترة
لمَّا يكون قاصد مخلوق
مش بتحوشه حيطان ودكاترة
..
ملك الموت بالطول والعرض
شايف الكون.. مش بس الأرض 
كل الأرواح ليها محطة
حظك يا اللي تأدي الفرض
.. 
ملك الموت
لا بيتوانى ولا يتعجِّل 
كل نفَس ويَّاه متسجِّل 
ولا يقبل عن حد بديل
ولا فيش عنده معاد يتأجِّل
..
ملك الموت تكليف متسيَّر
ازاي جدول موت يتغيَّر 
ولا تفرق أمراض ولا صحة
ولا تفرق في كبير وصغيَّر 
..
لا بيختار ولا يوم بينقي
ولا يخفض في مكان ويرَقي
ولا بيتوه ف يوم عن سكة
ولا يقدر ينساك ويبَقِّي
..
ملك الموت الموت هيصيده 
يقبض روحه بذاته و إيده 
وربك لمَّا يريد بمشيئته
يبعث كل الكون ويعيده 
..
مهما شروق الشمس غروب
لو ينده فيش منه هروب
ويا ريت بس نكون فاكرينه
من عمايلنا السودة نتوب