"الله محبة".. قصيدة شعرية جديدة للطهطاوي

والحُب للمؤمن شعار

الحب لمّا يبقى باين

والسماحة تفوح جناين

نلقى حضن الكون دا دافى

تصبح الضلمة نهار

حُب لو عطَّر قلوبنا

يملا ضى النور دروبنا

وكل خطوة سكة تحلا

تصبح الدنيا انبهار

قلب لو ضاع حُب مِنُّه

راح يعجِّز قبل سِنُّه

مهما كان المال فى إيده

راح يعيش م الهم نار

لمّا بينَّا الحب يطرح

راح يحلِّى أى مطرح

والعيون تفرح تغنِّى

يملا كل الكون عمار

سر حُب يزين وجود

أحلى غنوة ناى وعود

ألف وردة للى أخلص ف المودة

واللى سايع كل لون

عاش يغرَّد جوا كون

حَب وطنه ... صان ترابه

عُمره ما عكَّر شرابه

لمَّا تكره انت أخوك

تلقى كل الدنيا شوك

تلقى كل الناس سابوك

تلقى طعم الدنيا مُر

اغتراب

تبقى للعطشان سراب

ألف وردة للى عشش جنب طيره

مامنعشى حد خيره

حَب غيره وأهل داره

أو ماخنشى ف مَرَّة جاره

ألف ورده للقلوب

اللى لو عشقت تدوب

اللى بتحب بصحيح

فيها بلسم للجريح

صامده ما اهتزت لريح

للوداد دايمًا تصون

طاهرة ما تعرف تخون

أو تضر

جوّا منها الخير يسر

لمّا يبقى بينا بُغض

ولا تار

لمَّا نكره بعض عار

الله محبة

والحب للمؤمن شعار