مشاعر شاعر
أنا عاطف
ماحد عليا
كان عاطف
بابيع الورد ف الميادين
ماحد اداني يوم ورده
وارش الميه ف البساتين
ماخدت شويه بموده
فرشت مفارش الأفراح
ماحد طلبني يوم اقعد
ورشرشت الهوا تفاح
قالولي كفايه روح وابعد
وعلمت الكتير علمي
وادبت الكتير ادبي
فضنوا عليا حتى بشكر
وقالوا ذكاء أكيد منا
وحتى أدبنا تفصيلنا
كتبت الشعر امدحهم
فجحدوا دوري واتمرعوا
وخدت بأيد كتير منهم
وسابوا ايدي ع الهوه
ونجانى الحليم منهم
وسقطوا فيها من جوه
فدللدلت الحبال أنقذ
كذا يوسف من الابيار
لقيته بيشكر الأحبال
وحتى ماشفشي بالانظار
إيديا وجرحي ودماها
ولاعرق الجبين ساعة
وكنت باشد بنباهه
عشان وأنا بارفعه جنبي
مايت خبطشي ف الجدران
ووعيت الكتير يفهم
و مش فاهم
كمان يسأل
ولما سألت عن عنوان
فعمل الكل من بنها
شاركت ورحت ف الأحزان
لقيت الكل مناديلهم
ف حالة غلق
لدموعي
سابوها تبل جلابيتي
ماحدش قال هانغسلها
هاننشرها
ف شمس الحب
ولما تجف نكويها
وفعلا قاموا كوينها
بهجر البين ورشوا
مادة تكويها
وريحة عرقي لامتهم
زرعت الود جواهم
ويوم عيدي ماعرفونيش
ولملمت الكسور فيهم
ويوم كسري ماجبرونيش
ووديت القريب منهم
ورديت الغريب عنهم
سقيت العطشانين منهم
وكنت حراسة لزمانهم
وسابوا حروبي وفاتوني
وجايز قبضوا يوم بيعى
وفرحوا كتير لتقطيعى
أكلنا من طبق واحد
وأكل الصحبة عهد ودين
لقيت الطبق مكسور
ومرمي حتى ف المواعين
ولاعدى على الموازين
زرعت الأرض بالاصناف
وقولت الكل راح ياكل
وتم عدالة التوزيع
خدوا المحاصيل بأنواعها
ماسابوا حتى قشايه
ولا بذرايه ونوايه
وسابوا جواب
بلون باهت
ومتعلق ف شجرايه
بلاش الكسل يلا
وازرع
زود الغله
ها نيجب يوم
حصاد الغيط
ويستحسن ماتبقاشي
هنا موجود
عشان مانشوفشي كرمشتك
وضهرك إللى انحنى م الشغل
ده صعب نشوف هذا المنظر
وجائز نبكى ونهدر
عليك الدمع
بلاش تيجي
وخلى الصورة تتمخطر
ف اذهانا لطول العمر
ويفضل للبهاء عاطف
ويصبح للنماء عاطف
ويرضى بالبلاء عاطف
ويمسح دمعنا عاطف
ويجمع جمعنا عاطف
ويحمل همنا عاطف
يحارب حربنا عاطف
ويتلقى السهام عاطف
يلوم الناس كمان عاطف
ويدينا الفلوس عاطف
ويجبر كسرنا عاطف
ويفتح نفسنا عاطف
ويزرع وردنا عاطف
ويسمع للكلام عاطف
يارب تكون فهمت يا........
عاطف
اشكر كل من ساندنى (وهم كثر)
وطبطب عليا ووقف جنبى
وايدنى ومسح دمعى(وهم لاحد لهم)
وخدنى جوه احضانه
ودافع عنى باستماته
ومن تذوقت من أيديهم
طعم الفرح
ومن منحنى كل الحب(وهم الأغلى)
لهم فقط تحية إجلال وتقدير
أما من اقصدهم فى قصيدتى(وهم قله)
ربنا يسامحهم ويغفر لهم ويرضى عنهم
هذه القصيده ليس معايره ولكن مكاشفه حتى نلحق ما بقى منا
من إنسانية .....
