القلب خريطة جغرافية

أنا قلبي كتاب جغرافيا الأرض 
ممدود على خط الطول والعرض 
زى سحابة خير بتمطَّر 
تبقى وضوء لعبادة الفرض 
..
انا قلبي كتاب لخريطة الجَوْ 
يحميك بروح من ريح النَوْ
لو نسمع صوت الضحكة بتاعتك
فمناخ الكون يصفى و يحلَوْ 
..
انا قلبي بحور وبجزر و مد
موقع ممتاز وبفاصل حد
وقلبى يساع سكان الكون
ويساع أضعافهم تاني بجد
..
لو كل مناخ ف الكون متجمِّد
رافضه سخونة الصيف تتهمِّد
وبدون الجبر أو الإكراه
على عقد هواكى مضيت متعمِّد 
..
جغرافيا الكون يابس مائي
والقطب شمال وجنوب نائي 
شرايين الحب بحور عذبة
ألِفِك أنهار حفَرت يائى
..
إعصار براكين نهرك جافي
انا بيئة حضنى شتاء دافى
ودروبِك كثبان شوكية 
هامشيلِك فيها ولو حافى
.. 
لو ساكنة حبيبتي جبال الألب 
هنشد وراها الروح والقلب 
ومهما البراكين ترمي حممها 
الموجب عمره ما يصبح سلب
..
لحبيبتي هاعدِّي جُزر خلجان 
فوق راسها هاحط الورد تيجان 
و قصيدة شِعرى تسد أوزون
وتحيَّر قلب الإنس وجان
..
نطلع على سطح هضاب التِبْت
ولحبل الود ف عمري ما سِبْت 
وان كنت قديم م العصر الحجري
عمري ما قلت في يوم أنا شِبْت
.. 
نباتات طبيعية سافانا كارفور
وفتحت في قلبى الحُب نافور 
مقياس الرسم بطول كفِّي
ويكفِّي هواكي محيط محفور 
..
وباشق هضاب شبه جزاير
في مواسم هجرة كطير زاير
لو قلبك يعطش يا حبيبتى 
من شوقى السيل يبقى غزاير 
..
دا خريطة كون لو تتقسَّم 
على كف هواكى المترسِّم 
من طلة وشك يا حبيبتي
جغرافيا الأرض هتتبسِّم
..
ومنابع نيل ترتاح فى مَصَب
والتربة الخصبة لموز وقصَب 
لو جف الحب من الأرواح 
هنلاقى الدنيا هموم ونَصَبْ 
..
ف الدلتا النهر بيتفرجَح 
ومؤكد حبِك ع الأرجح
لو إيدك لمسَت يوم قلبي
طبقات الأرض هتتمرجَح 
..
بخريطة سلالات بشرية
أجناس عِشَريَّة و حِشَريَّة
تضاريس الأرض بتتمكيج
بتداري وشوشها الكِشَريَّة
.
بالحب أنا قلبي محيط هندي 
والطقس الدافى كتير عِندي
وطلعت جبال كل الدنيا 
وغلبَتْ ف عوم بحار مِنْدِى
..
على قمة جبلى أنا حطِّيتك
بسحابة شعري وغطِّيتك
ورويت صحاريكى بودياني
على حدك عمري ما خطِّيتك