قالتلي ستي

قالتلي ستي يابني فــــوق و مـــالك ياد جـــــرالك إيه

أنا رايحه ياواد ع السـوق فقوللي اللي أنت نفسـك فيه أجيبلك جزمـــه و عبايا !؟ أجيبلك شنطــة و مرايا !؟

مع ستك فلـوس ماتخافش و كل الســــــــتر ويايا 

يزيــــــدك ربي يا حبيبتي و حسـك عنـــدي بالدنيا 

لكـن و الله يا سـتــي أنا نفسي ف حاجات تانيه 

هاتيلي ياستي باكو حنان بريحة ناس و أهــل زمان 

هاتيلي حزمتين إخـلاص يدفـــوا القلب م الاحزان 

هاتيلي ناس قلوبها براح وصاحب في الوفــا شاطر 

هاتيلي صحبتين أفــراح و رحمه و جـبر ل الخاطر

عليا دنيتــــــــــــي ضاقت و فيها ليــــــــلاتي بتكفى

ودمعة روحي انا إشتاقت لعود طيبه وعودين عفه

تعبت يا ستي م الخنـدق و من طعـن السهــــــام فيا 

هاتيلي بيت كده محندق حيطــانـه تشــر حنيـه 

و لو عـــــــدى بتاع العـز هاتيلي معاكي منه وعد

و هاتي معاكي مترين حظ أفصلهـــم عبـاية سعـد

وهاتي معــــاكي مستقبل معــــاه الهم و علاجـو     

و لا تقــــولي إني بستهبل أنا و الله محتاجو   

أنا كلي وجــــــع و كسور فهـــــــاتي نص كيلو أمان 

أنا عايز أعيــــش مستور و مش عاوز أعيش متهان       

هاتيلي بــلاد ما بتهونشي و شعب نهـائي ما حزنشي 

هاتيلي عروبة لا بتتـذل وقدس لاهان ولا إتخانشي 

فهاتي و زودي الفكـه و خللي إيديكي ما تعـدش 

دهسني خوفي و إتكا و صلاح الدين ما بيــردش 

هاتيلي و النبـــي سكه لا اتــــوه فيهــا و لا اتهـزش 

فا ضحكت ستي كام ضحكة قالتلي ياواد مايتعزش 

منين أقدر أجيب حاجتك و طلبك قـولي فين ألاقيه 

دا أسهل يابني على ستك تجيب السوق ب كل ما فيه