قصيدة مِروت
من زمان
والحب عندنا حاجة تانية
قصدى أولى
حتى بادئ م الطفولة
مصرى أصلي وله تاريخ
له حلاوة أحلى صورة
الڤالنتاين ده حاجة
لسه نونو
جنب حب زمان وكونه
الرومانسي
اختراع مصرى قديم
ابتدعنا كل زاوية
وكل حته
ف الرومانسية الرقيقة
الملك علشان حبيبته
نحت لها معبد عظيم
جوه الصخور
عمل عشانها بحيرة واسعة
حولها أجمل زهور
من زمان وأحنا الأساس
شعب بيحب بحماس
والقصص ف الحب شاهده حاجة جامدة
منقوشة ع الجدران
كتير
دي أميره وده أمير
حبوا بعض بشوق
كبير
حُب ف القصر الكبير
حُب شعبي كمان خطير
حُب طيبة وحُب منف
وابيدوس
حُب ع الصعوبات
يدوس
حتى من قفط البعيدة
والحبايب كله ساري
زى
أحمس... و نفرتاري
حبهم أحلى الأغاني
أخناتون... و نفرتيتي
لما قالت أنت بيتي
رعمسيس و نفرتاري
واللي شوقهم له معاني
وأمنحوتب ....
و زوجته تيي
حبهم فريد نبيه
من زمان والحب اسمه ياناس
مِروت.....𓌻𓂋𓅱𓏏𓀁
يعنى هو حبيب حياتى
ب ..احبه موت
وال مِروت.....𓌻𓂋𓅱𓏏𓀁
ماكنش كافي
يوصف الحب اللي صافي
والمشاعر اللي ملهاش
حد ومثيل
زودوا وصف ومشاعر
❤️ عا مِروت ❤️
يعني حب عظيم وصادق
مالوش ضوابط
أو شروط
حب عذب وطعمه حلو
له موسيقى باحلى صوت
والعذوبة خلته
❤️ بنرت مِروت❤️
حب راقي ف اللطيف
حب مش ف الدنيا بس
لاء كمان جوه القبور
للأبد بيروح معاهم
اتوجد منقوش بنور
قالوا عنه كلام كتير
إنه هبةُ السماءِ
تسْكُبه الطبيعةُ في كأسِ الحياة
لتلطف مذاقَهَا المرير
حب صعب تصيغ
ف وصفه
مخلوق إلهي
كالكون ده نفسه
الحبيب قال ف القديم ليها ...هى
هى بس
حُبي لكِ
ينْفَذُ إلى كلِ جسدي
كما يذوب المِلْحُ في الماء
كما يمَتزِجُ النبيذ بالماء
أنت
"جميلةُ الوجهِ"
"عظيمةُ المحبة"
" مُنْعِشَةُ القلوبِ"
"مشرقةٌ كالشمس"
"سيدةُ البهجة"
"مفجرة الكروب"
"سيدةُ النسيمِ"
"سيدةُ جميع السيدات"
"سيدةُ الأرضين"
"جميلةُ الجميلات"
