مين مانفسوش يوم يغمض عينه ع الدنيا نهائي

مين مانفسوش يوم يغمض ... عينه ..ع الدنيا نهائي

ولو يفتح يلقى نفسه ... طفل ......مادخلش ابتدائي

السنين ترجع به تاني ........... للي راح منه و يلاقي

كل ناسه الحلوة باقيه .... وكل شيئ على حاله باقي  

.

يلقي دنيــا فيها نخـوه ........ فيها صح و فيها عيب 

النفوس رايقــه وجميلة ..... و القلـوب بفته وحليب

البيـوت كان ليها ضحكة ... عمــرها ما ف يوم تغيب

والشـوارع من حنانهـا ...... كات تطبطـب ع الغريب

.

يلقى روحه ف حضن بيتهم ..... و القلوب متجمعين 

يلقى نفسه ..... ف وسط أهله وبين جيرانه الطيبين

وسط ناس ضحكتها صافيه ... فيها رحمه وفيها لين

وسط .. حته .. بيوتها دافيه ... مش بتأوي الكدابين

.

يلقى عيله و يلقى لمه ..... و يلقى بيت مليان حياه

و أم ماليه عليه حياته ... وعايشه بس عشان رضاه

أم قايمه و نايمه تدعي ........ ولو تبان ف عيونه ٱه

يلقى ... حنفية دلعها .... و طبطبتها ......... مغرقاه 

.

يلقى ابوه ضهر وحمايه .... وحضن م الدنيا مداريه

الحياه تعمله خاطر .... لجل إسمه ........ و تشتريه

يلقى حتى ..... علقه منه ......... تعدله و تشد فيه

و اما ابوه يلقاه بيبكي ..... يحضنه ... ويبكي عليه

.

يلقى اخته ويلقي اخوه ..... و النقـار بينهم ساعات

دوشه ... لكن غنوه حلوه .... ... جوه ودن الأمهات

يلقى شخطة أب تنده ....... كله يخرس من سكات

عيب ياواد دا انت اللي بعـدي بكـره هتشيـل البنات

.

يلقى أهل منين مايمشي و القرايب ....... يحضنوه

دا ابن عمه و دا ابن خالتـه و دا اللي أكتر من أخوه

عم غالي و خال حنين ......... يبقوا زي امه و أبوه

يلقى جيره وصُحبه حلوة ... يبقوا عزوه ويسندوه

.

يلقى صوت النقشبندي ..... في الصيام يفرح قوام

زينه بره ..... و زينه جوه قلوب ماتعرفش الخصام

و طقم عيد ياخده ف حضنه ... لما ليلة العيد ينام

بالعيديه يبات بيحلم .......... بكره هبقى معايا كام

.

الأراجوز .... اللي جمع ......... العيال من غير أوان

إستغمايه و صلح ......... إوعي تخبط ... ع الودان

هاتلي عسليه و توفي .......... هاتلي دَردُميـا كمان

الفلوس دي جديده نوفي ....... هاتلي بالباقي لبان

.

يلقى أيام هوه فيها ......... راكب الدنيـا ب سحابه 

الحياة جنينـه ف عيونه .... لسه مادخلهـاش ديابه

هوه بس عليه يأشر ........... و كل أحلامـه مجابه

يلقى أم بميت محامي ... و يلقى صراف اسمه بابا

.

يلقى نفسه تاني عيل ..... باينه ف عيـونه السلامه

هوه بس عليه يشيـّل .. هَمُّـه ... واللي يشيلوا ياما

ليل نهار يجري و يلعب .... ماتفارقهوش الابتسامه

عمره ما شال هم بكره ....... حتى لو هتقوم قيامه

.

مين مانفسوش تاني يرجـع لـ الزمـان اللي ماجاش

حتى لو عاش ربع عمـره بس إسمه ... شويه عاش

إحنا خـدنا الحلو كله .......... لما كان لســه ببلاش

بس دلوقتي بندفـع .... التمـن ...... لـ الدنيــا كاش