قصبدة " ياللي مكسور الجناج"

خلِّي بالَك بس منها 
وادخل المطبخ وعينها 
راح تشيلك فوق كفوفها 
راح تحطَّك جُوَّا عينها 
هدِّي سرَّك وطِّي صوتك.. القانون ما بقاش في صالحك
 لجل فيزتك عايزة موتك .....لو تعوزك راح تصالحك
عم آدم عيش مسالم ....تبقى سالِم 
ربِّنا بالحال دا عالِم
الحريم بقى صوتها عالي 
والرُّجولة بقت مآلم
اوعى تبقى ف يوم فتوَّة .. اصحى يا ابني آه وفوق
حًوَّا ليها قانون وقوَّة .....حَواء زيَّك في الحقوق 
وافتكر كتب الكتاب.... وافتكر كيد النِّسا
والملامة والعتاب... والمناورة ف المسا
والمقدَّم والمؤخَّر 
والمحامي وراك ينخَّر
تنخلع لو قال ما تعرف
تنخلع لو قال تشخَّر
واللي بيطالب بنفقة... واللي بيقول فين دهبها؟!
مش هتلقى حنان وشفقة.... والجيران تقول نهبها
مهما تحلف او تناهد.... او تقول دخلك قليل
رايحة تلقى ألف شاهد ....رايحة تلقى مِيت دليل
محكمة أسرة ومحاضر ...... والسَّكن من حق زوجة
قول نعم اوكيه وحاضر... اوعى تمشي عكس موجة
كلُّه عن حَوَّا بيدافع ........... ويقولوا آدم مفتري 
ويَّا حَوَّا ما عدت نافع.... ناقص تبيعنا وتشتري
الحريم تحلف تأكِّد 
بالبُكا والصُّوت جريء
دا الرِّجال دايمًا تنكٍّد 
و إنِّي حَوَّا ملاك بريء
دور الحريم ايَّوَا اختلف .....  كل يوم الكون في حالة
سوسن بنلعب دور خلف ... . وحوَّا ترفض تبقى عالة 
القميص اكويه بنفسك... .......... هيَّا مش خدامة ليك
حوا صارت غول ينافسك .. مين يا مسكين حَس بيك ؟!
هدِّي سرَّك مَشِّي حالك... هات خضار م السوق وبضَّع
دا المجال ما بقاش مجالك ..ومش بعيدة إنك ترضَّع
لو مسحت الشَّقَّة مَرَّة........ فيها إيه او مرتين
او تنام على الدِّكة بَرَّة..... او بكيت لك دمعتين
لو حماتك جات حداك..... قوم ونوَّر شمعتين
ابكي يا ابني بدمع عين
هو سي السيِّد دا فين 
الحريم بقى ليها قبض ... ..........زيك بتقبض م المكن
عٍرق الرجولة خف نبض ......صوتك يا سي السيِّد ركن
الزَّمان لفلف ودار ....وصوت أمينة صار يعاند 
وانت لافف ف المدار .... مش هتلقى حد ساند 
الحريم بقى ليها ضهر ... ألف مجلس مِيت نيابة
شقة تاخد ويَّا مهر ........ وتخلعك من غير إيابة 
و مهما أنت تموت بقهر.... ابكي ع الماضي بخيابة
من بحر اشرب ولَّا نهر .... مين هيقدر ع الديابة؟!
ياللي مكسور الجناح..... فين يا ناس سبع البورمبة
ليه بقيت زي الوليَّة... وصعب حتى تجيب كرومبة
مهما تحرقلك في دمَّك ...افتكر إنَّك مضيت 
قايمة شاهد فيها عمَّك... قول على نفسك قضيت
اوعى حالك يبقى مايل
مَرَّة هدِّي ومَرَّة حايل
وبوس إيديها 
وامسح السَّجَّاد ونيش ........ ف البلاط زوِّد نضافة
اوعى مَرًّة تقول ما فيش.... .او تخبِّي جنيه إضافة 
اوعى تكدب ع المدام ......و قول نعم حاضر تمام
وهدِّي سرَّك بس عِيش
وهدِّي سرَّك بس عِيش