طريقة عمل المخلل المشكل والليمون والخيار بالمنزل بسهولة
المكونات
ليمون معصفر
ليمون عادي
بصل
زيتون أخضر
قرنبيط
خيار
جزر
شطه خضراء
لفت
بتنجان
الكرنب
الليمون المعصفر
كيلو ليمون _عصفر _حبة البركة _ملح _ شطه حمرا مفرومه _زيت
اسلقى الليمون نص سلقه وبعدين افتحيه أربع أرباع واخلطى باقى المكونات واحشيه ورصيه فى برطمان وكمليه مايه ورشى على وشه زيت واقفليه كويس تقدرى تفتحى عليه بعد أسبوعين هيكون استوى
الليمون العادى
كيلو ليمون _ملح _ شطه حمرا مفرومه
اسلقى الليمون سلقه كاملة وغيرى المايه على مدار يوم حوالى 3 مرات وهاتى برطمان ودوبى فيه الملح والشطه وانزلى بالليمون وكملى البرطمان مايه واقفليه كويس هيستوى بعد اسبوع
البصل
كيلو بصل _ ملح _ خل _ شطه حمرا مفرومه
حطى البصل فى حله على النار لحد ما تغلى اطفي النار و سبيه فى الحله لحد الميه ما تبرد وبعدين قشريه وهاتى برطمان وحطى فيه ملح وخل وشطه حمراء مفرومه وحطى والبصل واتوصى شويه بالخل بيستوى بعد أسبوعين
الزيتون
كيلو زيتون أخضر _شطه خضراء _نص كيلو ليمون _ ملح شطه حمرا مفرومه _زيت
هاتى الزيتون وشقيه وانقعيه لمدة يومين وغيرى الميه كتير على اد ما تقدرى علشان تطلع المراره اللى فيه هاتى برطمان واعصرى الليمون كله وقلبى معاه الملح والشطه الحمراء المفرومه وانزلى بالزيتون ومعاه كام قرن شطه خضراء وكملى البرطمان مايه وحطى قشر ليمون وزيت على الوش واقفلى البرطمان كويس بيستوى بعد شهرين
القرنبيط
ثمرة قرنبيط _ ملح _ شطه حمرا مفرومه
قطعى ورد القرنبيط وهاتى برطمان ودوبى الملح والشطه الحمراء وانزلى بورد القرنبيط وكملى البرطمان مايه واقفليه كويس بيستوى بعد اسبوع _ القرنبيط بيتخلل نى
الخيار**
كيلو خيار _2 فص ثوم مفروم _معلقة نعناع ناشف _خل _ ملح
هاتى برطمان ودوبى الملح والنعناع والثوم والخل وانزلى بالخيار وكملى البرطمان مايه تقدرى تاكليه من تانى يوم
الجزر
كيلو جزر _ملح _ خل _ شطه حمرا مفرومه
خرطى الجزر وهاتى برطمان ودوبى الملح والشطه والخل وانزلى بالجزر وكملى البرطمان مايه واقفليه كويس بيستوى بعد 10 ايام
الشطه الخضراء
كيلو شطه خضراء _ملح _ شطه حمرا مفرومه
خرمى الشطه بالسكينه وهاتى برطمان ودوبى الملح والشطه الحمراء المفرومه وانزلى بالشطه الخضراء وكملى البرطمان مايه واقفليه كويس بيستوى بعد 10 ايام
البتنجان
كيلو بتنجان صغير _شطه خضراء _ ملح_ كمون _ليمون _ ثوم _ زيت
اسلقى الباذنجان نص سلقه والشطه غلوه واحده وافرمى الشطه الخضراء مع الملح والكمون والليمون والثوم وفتحى البتنجان واحشيه ورصيه فى برطمان وكمليه مايه ورشى على وشه زيت واقفليه كويس بيستوى بعد أسبوعين وممكن يفضل معاكى سنه كاملة بس احفظيه فى الثلاجة
مخلل اللفت
المكونات
2 كيلو لفت _ ملح _ خل _ شطه حمرا مفرومه _ بنجرايه
الطريقه
نضفى اللفت واغسليه وخرطيه بالطريقة اللى تحبيها وحطيه فى برطمان ودوبى الملح والخل والشطه الحمراء المفرومه والبنجرايه فى الميه لكل لتر ماء 4 معلقة كبيرة ملح ونص كوب خل وكملى البرطمان بمحلول الملح اللى عملناه بيستوى بعد اسبوع
مخلل الكرنب
المكونات
كرنب _ملح _ فلفل أحمر مفروم _ بنجرايه _ماء
الطريقه
دوبى الملح فى الميه لكل لتر ماء 4 معلقة كبيرة ملح ومعاها الفلفل والبنجر وقطعى الكرنبه قطع متوسطه وهاتى برطمان وامليه بالكرنب المقطع وانزلى عليه بمحلول الملح واقفلى البرطمان بيستوى بعد 3 ايام
ملحوظة هامة
أى مايه بتستخدميها تكون مغليه من قبلها ولما تبرد استخدميها في التخليل
البرطمانات تكون مغسولة كويس وجافه
ما تحطيش ايدك فى البرطمان خدى منه بالشوكه علشان ما يعملش ريم على الوش
لكل لتر ماء 4 معلقة كبيرة ملح ونص كوب خل
