قصيدة دار المسنين
الام :
بتلم ليه..
الهدمتين والطرحتين والشبشبين ؟!!!
ماتقوللي ياابني واخدني فين ؟؟؟
.
الابن :
على بيت جديد ...
فيه ناس كتيـــر قــــوى طيبين
نـاس نفـس سِنـِّـك و ف مقامـك
هيقـدَّروكى و يعرفوا قيمة كلامــك
على بيت سعيد ..
بيعيشــوا فيـه المَـوْعوديــــــن
عاجبـــك قوى بيتنــا الحزين ؟؟؟
ح اخدك أوام ...
على بيت رخام كله انسجام
مش بيت ركام مبنى بطين
الام :
( علي بيت جديد ) ؟؟؟؟؟!!!!!
مش عايزه ياابني بيت جديد
البيت دهه أناعشت فيه خمسين سنـه
مااعرفش غيـــره أي بيت ؟؟؟
أنا جيت عروســه صغيره
و قعدت فيه لمّا أتحنيت
أسأل بلاط الأرض ؟؟؟
وأسأل كـــــــل حيــط
مش عايزه غيره أي بيت ؟!!
الابن :
هوه انتى غاويه تعاندى فيا و تتعِبي
ماتبطـلى بقى حَـبّـتـيـنـــك و الـنبي
ماتبطلى طبع الحريم ف المسكنه
قوليلى ايه عاجبك هنــــــــــــا !!؟
بيـت كلـه هَـــــمْ و عكننـــــــه !!!
إستهــدي بالله و اسمعــــي
قومي بينــا نلحـق و قتنـــــا
الام :
أنا عشت يابني سنين هنا
وأتمني أموت برضك هنـــا
علي فرشتي ومخدتي والبطانيه واللحاف
أفتح عينيه كل يوم وأقفل عينيه كل يوم
علي إيد أبوك بتضمني ف صــــورة الزفاف
بتدفي قلبي وتحضنه ف سنيـــــــ ـــن عجاف
وانا عارفه يابني ان خدتني البيت الجديـــــد
أنا رايحه أخاف وانا ياابني مش عاوزه أخاف !!!
الابن :
.
بطـانيـــة. إيــه ياحـسره
دا اللحاف الفقـر قارضـو .. !!!
إنتى بتسمى هلاهيلك
دى يا امه عفـش برضو ... !؟
.
و ان واكله قلبـــك
صورة ابويا اللى انتى فيها
ابقى خدبها ...
وهناك على الحيطه الجديــــدة
علّقيها كما الزينــات
والذكريات مش راح تأكَّلّي الولاد
و لا يوم هتكسيلى البنات
ماتفوقى يا امـــه و النبي
كفايه زَنْ ولْوَلـَه على ماضى فات
كفاية يا امـــــــــه و بطّلى
و هَـم الحنين والذكـــريات
وان كان على ابويا خلاااااااااص
أنا أبويا مـــــــــات
الأم :
اخرس يا واد متقولش أبـــداً
( راجلي مات )
ف الأوضه دي أنا لسّه عايشه ويّا أبوك
عمري. اللي فـــــات !!!
أصل الحبايب لو سابوك
بيعيشوا فيك بالذكريات
خليني ياابني ويّا أبوك أصحي وآبــات
وأعيش معاه باقي الساعات ...
واشم ريحته ف الحاجــــــات
مين اللي قالك إنه مــــــــــــــــات ؟!!
لسّه البدل جوّه الدولاب
جنب السرير أخر كتاب
ولسّه سجادة الصــــــلاه..
والسبحة فوقها منـــوّره
ولسّه بااسمع ضحكته وسط السكـات !!!
اخرس يا واد .. متقولش أبداً
( راجلي مات )
الابن :
يووووووووووه
ذكـــريـات ..
ذكــريـات ... !!!!
ملعــــــــون أبوهــــا الذكريات
كرهـت يا امـــه الكلمـــة دي
و كرهـت و يـاهـا اللى فـــات
الكلمــة دي
بتيجي سيرتهـا وتنـدبي
وتقلِّـبي كل المواجع. بالساعات
هوه إنتى بتعــزى النكد
من غير سـبب !؟
هـوه انتى غاويه يا امه
كُـتــــر مسـلـســـــــــــــــــلات !؟
هواه مُـوشَّـح كل يــــوم
بنــام عليه
و عليـــــــه نـقـــــــــوم
مـــــوال قـــديم
صاحية و نايمة تغنيـــــهولي
لساكى عايشه
ف ست ألمظ و الحامـــولي
لساكى فاكره الدنيا شابـَّـــه
بـ عُقــد لـولي
كتروووووا العيــــال
كتروا العيال ف البيت خلاص
مبقتش زى زمـان بـ طُـولى
..
ماتعصبيــــش إبنــــــك بقـــا
ما تطلعيــــش أم الهَـــــوَس
هنسيب خلاص بيت الشّقـا
و آخـدك على بيـت الوَنـَـس
الأم :
أنا عايشه يابني ..
بحاجة أبوك متونســـــــــــــه
وبدخلتك ويّا العيال متونّسه
وانا عارفه ياابني
ان خدتني البيت الجديد
رايحه أتنســي
وانا ياابني مش عاوزه أتنسي ؟!!
فإن كنت محتاج الوســـــع
لاجل العيــــــــــال ؟؟؟
هـات العيــــــــــال
انا عندي يابني سرير كبير
ح ارقد علي حرف السريــر
واسيب لهم باقي السرير
وان كنت محتاج السرير ؟؟؟
خد السريــــــــــــر!!!
إن شالله أنام فوق الحصير
لكن أنام وسط الأمـــــان !!!
خليني يابني ف وسطهم
قدّرني واحده منهــــــــــم
باقي الزمان وماهوش كتير ؟؟؟
وحياتك أنت ؟!! ..ماهوش كتير
الابن :
.
هوه انتى ليه غاويه العِـنــَــاد ؟
البيت ده حقي فـ الـمـيـــراث ؟
و خلاص بقى بـ كُتر الـــــــولاد
وكأنه ســــــوق مليــــان بـ ناس
ما بقتش أطيق فيــه الـقـُعــــــاد
و انتى اللى زحماه م الأســـاس
و انا ع البلاطـــه صبري فـاض
و البيت دا ما يسعناش خـلاص
صحيوا الجيران ما تعـاندنيـــش
ما تشمتيـش فينا العِـدَا
يـاللاه بقـى و ما تعصلجيــــــش
هوه انتى ليه مِـتـْرَدده ؟
ونا هبقى أجيلك ما تخـافيش
أول ما افضَى ف يوم كده
الأم :
أنا مش حاعيش أدّ اللي عيشته
ولانفسي أعيش بعد اللي شفتـه !!!
كمّل جميلك .. !!!
وأستر الباقي ف حياتــــــــي !!!
أنا عمري يابني قصاد عينيك
فرّطت ف أمــــي أو حماتـي ؟؟؟
إن كان علي ضيق المكان
ما أنا قلتلك خد السريــــــــر !!!
وإن كان علي ضيق المعيشه
أبوك سايبلي معاش كبيـــــــر
قسمته يابني من زمان النص ليك
و الربع مصــروف العيــــــــال
والباقي مصروف الـــــدوا !!!
لكن خــلاااااااص
وحياة عينك ماعاد ح يلزمني الدوا
الابن :
يا امه حـــرام
نفضـل نـلتْـلِتْ ف الكلام
كتر الحديت و المَحْلَسَه
ما بقــاش يفيــــد
متفخشرة بكبر المعاش ؟!!!
اطمّني .. دا يادوب يكفى
أجــرة البيــت الجــديــد
.
و لســه يامــه كمـــــــــان
دواكــــى و هِـدمـتيـن للـ لِـبْــس
دا غير كمان تمن الكفن
يـــــوم خــارجـتـــك و الـتِّـبْــس
هــوه إنتـــــــى يا أمّـــه
لسه عايشه ع الجنيه الجبْـس ... !؟
.
لسّاكى شـايفه الدنيـــــــــا ورده
بـألــف لــــون ....... !؟
لسّـاكى فاكره ان المعـــــاش ده
مــال قـــارون ....... !؟
على فكره يا امـه :
عنــواني تـنـسيــه م الأســـاس
مفتـاحـك ابقى ارميــه خــلاص
مراتى غَـيـَّرت الكالوووووون
الأم :
معقوووووووول يا ناس !!!
عنواني ح انساه م الأســـاس
مفتاحي أجري أرميـه خلاص !!!!!
و الست غيّرت الكالوون ؟!!!
معقووووووووول يانــــــاس !!!!!!!
أنا عقلي ح يصيبه الجنـــــــون !!!
:
هوّ انت إبني
و لّا ديب ف ( أمّــــــه ) عَـوي ؟!!!
مش قولتك
وحياة عينيك ماعاد حايلزمني الدوا
خد المعــاش .. ؟؟؟؟؟؟؟
كل المعــــــــاش !!!!!!!!
لكن بــلاش ..
ترميني ف البيت الجديد
وأحس إن إبني الوحيــد
ربايتي فيه
راحت .. بــــــــــــــــلاش
؟؟؟؟؟؟؟؟؟؟ ؟؟؟؟؟؟؟؟؟؟
.
