طريقه عمل الكبدة بالردة في المنزل
الأول .. نطلبها من الجزار متقطعة شرايح رفيعة ولو متقطعة بماكينة كهرباء نقوله يقطعها على مقاس ٢ .. حلو كده
هنروح البيت لو مجمدة هنسيبها تاخد درجة حرارة الأوضة عشان ما تتقطعش مننا وعشان لما تنزل في الزيت ما تبردش
المقادير دي هنعمل بيها كيلو كبده بالردة .. لو محتاجين أقل نقسم المقادير للكمية المناسبة لينا
للتتبيله
كيلو كبدة متقطعة شرايح
3 معالق كبار عصير ليمون
3معالق كبار خل
ربع معلقة توم بودر .. او 4فصوص توم مفروم
ربع معلقة بصل بودر
معلقة صغيرةكمون مطحون
معلقة صغيرةكسبرة مفرومة
نص معلقة ملح
معلقة صغيرةفلفل أسود
ما نحطش في تتبيلة الكبدة بصل نهائي .. ولا زيت لأنه هيخلي الدقيق يفك من عليها لما تنزل الزيت.
هنخلط كل مكونات التتبيلة مع بعض ونزل فيها شرايح الكبدة ونسيها ساعة تشرب التتبيلة بعدين نجيب الشرايح ونزلها فالخليط المكون من كوب ردة
عليهم معلقه كبيره نشا
ومعلقه كبيره دقيق
وبعدين ننزلها فزيت غزير وساخن
هيطلع لونها فاتح .. ومقرمشة وماسكة في الكبدة
الكبدة الردة تتقلي دقيقة واحدة بالظبط ما تكترش عن كده وهتستوي كويس
