تعظيم سلام كلمات الشاعر راضى على الطهطاوى

راجل الشرطة الهمام.

مِن قلوبنا بالمحبة ومش كلام

للمباحث والقيادة...والوزير صاحب الريادة

وامتنان لكل ضابط..بالعزيمة لدور تصدى

ضد فِكر سفيه ملابط....أو شِيطان ع الناس تعدى

واحترامنا للمجند والغفير

ف التَيَقُظ والتأهب والنفير

للعميد ..مأمور ..ملازم.....واللواء وعقيد ولازم

شُكر ليهم والتحية بالهتاف...للنجوم فوق الكتاف

تسلم الأسرة اللى ربِّت ...تسلم البطن اللى جابت

مهما موجة.. أزمة هبِّت.. ف كل موقف يبقى ثابت

ابن مصر الله يصونه

للوطن يحمى ف حصونه

يا ما طبَّق ف الورادى...للتسلم و استلام

ربنا يحفظ يعين 

كل رائد أو مقدِّم أو معاون أو أمين

قسم ...نقطة... أو فى مركز أو كمين

ف القطاع أو ف الإدارة... بالكفاءة وبالجدارة

كل مندوب كل فرد.. حَر... برد

حارس الخدمة وتمام ...تعظيم سلام

اللى يجرى كالمسارع..... لجل يطفى بيت حريق

اللى واقف جوا شارع ... يمنع الزحمة ف طريق

واللى تندهله يجيلك... وانت ف الأزمة وف ضيق

لولا شرطة الديب ينتِّش...فيل يدوس ف الغابة نملة

لجل تأمينَّا بيفتِّش .. واللى بينفِّذ بحملة

والتحرى بكل دقة لجل توضيح الأدِلة 

لولا شرطة هتبقى فوضى والضعيف هيعيش بذِلة

مين بيسهر ليل نهار.... لجل أمنك يستتب ؟!

يحمى منشأ يحمى دار ..ينهى فتنة بتار تدب 

انحرم ياخد إجازته ف كل عيد

روحه شالها فوق كفوفه

أى لحظة يكون شهيد 

لجل عينَّا يا ناس تنام ....

ألف مِيت تعظيم سلام

اللى يحميك من مبلطج أو فتوة

اللى حامى بلادنا جوة

جيش وشرطة وشعب واحد 

التماسك زادنا قوة

وف الصدارة وف الأمام ...راجل الشرطة الهمام

أى تهديد جاه ما همه 

لجل مصر فداها دمه

بالشجاعة يعيش مخاطر

لجل مصر بطيب وخاطر

اللى أقسم ميت يمين...بالصمود وبانتباه

للوطن يرفع جبين ...وهما رافعين الجباه

للى مات وهو عنَّا كان يدافع

واللى شايفينه بعينَّا من حياته وعمره دافع

بين شكاوى والإشارة والمحاضر

والبلاغ بيقوله حاضر

عُمْره ما جه يوم وكل....ولا قصر ولا مل

عُمْر عزمه ف يوم ما قل

وروح تفانت ف المهام......تعظيم سلام

للى مانع ناس تهرَّب...كان مخدِّر أو أثار 

قاطع إيد ارهاب تخرَّب...أو خبيث يشعل شرار

حصن لينا ضد مجرم

أو لصوص تهوى الضلام ...تعظيم سلام

لراجل الشرطة الهمام

ألف مِيت تعظيم سلام