نور أقوى من العتمة وطاقة أمل كسرت أي إعاقة
بطلتنا بكالوريوس آداب لغة عربية، كورسات في التعليق الصوتي والتقديم التليفزيوني، شغف وحلم بيكبر من الطفولة إنها تكون مذيعة..
بنتكلم عن بطلة تحدت الظلام ومستسلمتش وصنعت هي النور اللي تكمل بيه طموحها وتحقق حلمها.. تعالوا نعرف هي مين 👇
إسراء إسماعيل.. الإسكندرانية الجدعة، عندها ٢٢ سنة متخرجة من كلية الآداب قسم اللغة العربية، ربنا أراد إنها تتولد فاقدة للبصر لكنه أنعم عليها بنعمة البصيرة والروح اللي مبتيأسش..
إسراء من صغرها حلمها تكون مذيعة، شغفها وطموحها كانوا هما النور اللي بيحركها، وطاقة الأمل اللي بتخليها تمشي كل خطوة بنجاح وتميز..
إسراء أخدت كورسات في التعليق الصوتي والتقديم الإذاعي وكمان التصوير، وزي ما القدر دايما بيكون نقطة التحول اللي في حياتها؛ كانت على ميعاد معاه في مؤتمر "المبادرون" اللي نظمته وزارة التضامن الاجتماعي تحت رعاية رئيس الوزراء، وتم اختيارها مذيعة في Video Youm7- فيديو اليوم السابع علشان تكون أول مذيعة ضمن الفريق من ذوي القدرات الخاصة وبكده قدرت إسراء تحقق حلمها وتبقى مذيعة..
