رساله إلى معالي النائب
إنت عاوز تبقى نائب ....... !!!؟
له درايه و معرفه ............ !!!؟
وتبقى صوت كل الغلابه و تبقى صورة مشرفه !!!؟
و لا عاوز بس تقعد .. فوق كراسي مزخرفه ... !!!؟
و تبقى باشا و تبقى بيه .. و احنا نشرب بالشفا ؟
لأ بجد و بأمانه .......... إنت مشتاق للحصانه ؟
و لا نائب سد خانه .. و منلاقيش غير عجرفه ؟
.
.
شوف جنابك .......... !!!!
حبتينك .. ف الدعايه ... و المحايله ... و الوعود
والشعارات الجميله .......... والبهارات ف الردود
و انك انت هتبقى حاله و حاجه نادره ف الوجود
و انك انت هتبني ياما ..... و تملا صحارينا ورود
.
.
وبيك هتبقى الدنيا روشه..والأماني هتبقى طازه
و النعيم هيكون تالتنا ........ و النكد ياخد أجازه
كل حاجه هتبقى وردي ...... و طعمها ٱخر لذاذه
أي شيئ نحتاجه دايما تجري و تجيبه ف قزازه
.
.
لأ .. جنابك ............ !!!!
البشر ملوا و زهقوا .. و فاض خلاص الكيل تمام
م اللي غاويين المناصب ... و اللي عاليين المقام
واللي فاهمين الحكايه ..... بنبونايه ... و السلام
البشر .. مبقاش لازمهم ...... اللي بيبيعوا الكلام
.
.
إنت ليه فاهم جنابك ....... إنك إنت هتبقى باقي!؟
إنت ليه وقت انتخابك ..... عنتري وشهم وفدائي !؟
تبقى دايما بينا حاضر .. وتبقى سباق ف التلاقي
واما تنجح تبقى ذكرى ... فص ملح و داب نهائي
.
.
حتى لما ف جلسه تظهر ........ مره وتشوفك عنينا
إما نايم أو بتحكي ..... .... و يا صاحبك عن مارينا
إنت إمتى فضيت جنابك تحكي وتقول ع اللي فينا؟
إحنا مش ف دماغكو أصلا ....... إحنا وياكم ٱسينا
.
.
لعبه واحنا خلاص تعبنا .. م الكراسي المرصوصين
م الشياكه والحلاوه ........... من جناب المسئولين
واللي واخدينها وجاهه .... واللي عايشينها يومين
واللي بنشوفهم لشهر .......... ثم ... بيغيبوا لسنين
.
.
ياللي عاوز تبقى نائب ........ إتقي المولى ب ضميرك
عيش عشان الناس وبلدك قوللي مين غيرهم مصيرك
دا اللي ساندك همه ناسك .. همه دول سعدك وخيرك
واللي جابك مره نائب ....... بكره هيجيب حد غيرك !!!
