ديوان (١) حَبِّة مشاعر ع الورق

١.. أسرار السَّعادة 

ازرع قلبك كلُّه محبَّة ........ ازرع كل القلب حنان

املا حياتك خير وتسامح …. تلقى جناين ورد تبان

ابدأ خطوة ف درب طريقك . ضحكة وشَّك ضَي بريقك

خلِّي عبير يفوح من سيرتك . رشرش فرحة ف كل مكان

..

اوعى البسمة تفارق وشَّك … اوعى البهجة تهاجر عشَّك

افتح سِكَّة لكل طموحَك ............ اقفل للتَّكشيرة بيبان

انسَ الماضي وكل جراحه .....حبل الود ادِّيله براحه

اكتب بالألوان على سطرَك .. ارسم حلم بإيد فنان

..

اغنم كل ساعات الحاضِر.... مَلِّي عينيك م الورد النَّاضِر

خلِّيك صاحي لدق السَّاعة ........ إيًّاك تدِّى العمر أمان

مهما الشَّمس تغيب هتهل.............. والأنهار للصَّحرا تبل

أمنياتك راح تتحقق .......... بس الفرحة دا ليها أوان

..

خلِّي الطِّير في سماك بيغرَّد ..لحن هواك بالشُّوق متفرَّد

وافرد للأحلام جناحاتها ..... سيب لحصان الخطوة عنان

ربَّك شايف كل حمولَك....صِدق عزيمتك يمحي خمولَك

تلقى نشيد الحُب غناوي ..... ودَق القلب موسيقى كمان

..

اوعى اليأس يقرَّب مِنَّك....اوعى الشِّيب يبان على سِنَّك

خلِّي الطَّاقة تشع بريقها .... غنوة فرايحي بصوت رنَّان

سيب الحلم يقول غناويه…... واعزف ليه بالنَّاي ولاغيه

يغمر نور الصُّبح ملامحه .......... سيبه يطير زي الغزلان

...

حِب الجار وقريب وزميل ... خلِّي القلب نضيف وجميل

اجبر خاطر كد ما تقدر ..... ... زى ما هاتعين راح تتعان

طَوِّل بالك على حاقدينك .... اوعى الدُّنيا تنسِّيك دينك

اوعى ضعيف تستقوي عليه....... إيَّاك تحرج يوم إنسان 

..

املا القلب سلام ومَحَنَّة ..... فَضِّي الرُّوح من دمع الأنَّة

رَوَّق بالك بكرا هتفرج ... .......... اوعى بهَم تبات زعلان

حِب الخير للغير واتمنَّى ......... إنِّي قلوب النَّاس تتهنَّى

مهما تشوف نظرة حسَّادك ..... زوِّد م الخيرات إحسان

..

دوس على حزنك سمِّي وعَدِّي.اوعى الفكر يجيب ويودِّي

طُول ما الرُّوح ويَّاك متفائلة ...تلقى الضِّحك عزف ألحان

ابدر كل البهجة بإيدك .............. ربَّك من أفضاله يزيدك

بستانك بالحُب يخضَّر ........... تفضل عِطر ف كل زمان