أغلى نعمة ..عيد الأم

وفِرِحتي لمَّا عرفتي   .. إنِّي ف بطنك بتخلَّق
وبقيت جوَّاكي في حشاكي .. أنا حِتَّة لحمة ومتعلَّق
من دمِّك باكل واتغذّى .. وبارفَّس فيكي برجليّا
ولا عمرك قولتي انا بتأذَّى
لا ف رُوحَة مِنِّي ولا ف جَيَّة
وضلوعك كانت تتوجَّع ...  واللقمة ف معدة بتترجَّع
والدوخة ف شهور الحمل .. وف بطنك باسرح كالنمل
وفضِلتي يا أمي تستنِّي ..عايزاني أجيكي وتتهنِّي
وبتحكي لابويا عن شكلي ..وبتاكلي يا أمي عشان أكلي
مربوط أنا فيكي بالسُرَّة .. وشهوري التِّسعة يا ناس مُرَّة
وجاتك يامَّه أوان ساعتي .. والموت بعنيكي و شايفاه
وسمعتي الصرخاية بتاعتي
وفْرحتي وقولتي يا ضناي
أول شوف ف الدُّنيا عيونِك .. بالضِّحكة مليانة حنان
رغم الدُّنيا الواسعة الهِّو ..... من لمْسك حَسِّيتها أمان
يا حلاوة الفرحة بإحساسك . وانا لسَّا صغيّر ف اللفَّة
تاخديني ف حضنك بادَّفى ... وتدَّلِّي فيّا وبتشيلي
وبصوت حِنيَّة تغنِّيلي .....  وتقيسي بالشِّبر وكفَّة
وتقولي امتى يا نور عيني؟! .. أرقص يوم فرحك ف الزَّفَّة
وحابيت تاتا تاتا وباخطِّي .. وبحضن حنانك متغطِّي
أنا كنت يا دوبك أشاورلك .. ولا حد فاهمني كان غيرك
وصبحت أنا راجل وكبِرْت ... ولا قادر أوَفِّيلك خيرك
لمَّا عيونك بتشوف فرْحي .. من فرحتها يا أمِّي تدمَّع
لمَّا ف لحظة تحسِّي بجرحي .  يصرخ قلبك حزنه يسمَّع
لمَّا أسافر يوم ف الغربة .. ولَّا أكون مهموم  بالكربة
نبرة صوتي ونبرة حِسِّي ... قلبك يشعر بيَّا تحسِّي
يسألوكي بتبكي ليه ؟! ... تقولي ابني يا ناس بعيد
وقلبي متَّاخد عليه .... يالهفة قلبك على وجعي
والقلق اللي معشش فيكي
وتقضِّي ليالي سهرانة .. والنوم يجافيكي
دا أنا مهما أبرِّك ف حياتي ..ولا طول العمر هاكفِّيكي
أنا كنت اتشعبط ع اللعبة .. وأقولك لازم تجيبيها
ياما كنت اتشاقى وأضايقك .. وغلاستي كنتي تحبيها
على حسِّك قاعد بتدلَّع ..  وكأنٍّي أنا نونو صغيَّر
وحريقة ف قلبك بتولّع .. لو هَم شاغلني ومتغيَّر
لو شوفتي عيوني سرحانة .. بتقولي احكيلي و فاضفضلي
لو دعوة بقلبك  فرحانة ..... فالاقي الخير  زادلي و فاضلي
وبنظرة رمش وبعينيكي
بتقولي أنا فاهمة ملامحك
وساعات كتير باقسى عليكي .. وتقولي أنا قلبي مسامحك
مين غيرك أنتي عليّا حنيَّن؟! ... ياما بنقسى وقلبك ليّن
ياما خدتني عيالي دِي منِّك .. ياما كتير مشغول أنا عنِّك
يا ما رحمتش يوم أنا سنِّك
والغلطة وغلطة تعدِّيها
ولا قلبك عمره بيبيِّن
دا حنانك نبضُه في وريدي .. والوردة الحلوة وغصونها
يا أغلى نعمة بين إيدي .... وفقني يا ربِّى إنِّي أصونها
والعمر سرَقنا..والبعد فرَقْنا .. من غيرِك أنا قلب جريح
من بَعدك واقف متعرِّي ... وحدي وف وش الريح
ندمان ع اللحظة اللي ماكُنتش... كسبان لرضاكي
زعلان ع الكلمة اللي فاتتني .. من بِر دعاكي
سامحيني يا أمٍّي
ع اللحظة الحلوة اللي ماكُنتش
باقضيها معاكي