فـارقـك سيد الحبـايب

فـارقـك سيد الحبـايب من بعـد ما شـد عـــودك 

إفتكـــره ب ألـف نايب في صلاتك و ف سجودك 

كان عايـش لجل خـيرك كان كل الطيبيــــــن 

دلوقتي مالوهـش غيرك يفتكـــره ب دعوتين 

لو إيه في الكــون وراك خليك فاكره و شاريه 

أبـوك محتــــــاج دعـاك إوعـــاك تبخــل عليـه

.

اللي سنين عاش يحايلك و كل ما فيـه يحنوا 

إفتكــــره و هـو شـــايلك و مخبيك جـوه منه

دي عمايله و خيره بقيوا لو حتى مهوش قبالك 

إيديه و قلبه اللي شقيوا ولا ضـج و لا اشتكالك

دلوقتـي مهـوش معــاك و كاويـك الشـوق إليه

أبـوك محتــــــاج دعـاك إوعـــاك تبخــل عليـه

.

أهو فــارقك بالســلامــه أهو فــاتك م العجــايز

عاش يحـرم نفسه يامــا علشان ماتقولش عايز 

كان دايمـــا تحت أمــرك و الكــل بيحســـدوك

و الله إن عشـت عمـرك ما ترد جميـــــل أبوك

كات ريحتــه مطمنــــاك م العــالم و اللي فيـه

أبـوك محتــــــاج دعـاك إوعـــاك تبخــل عليـه

.

جــربت الدنيــــا بعده !؟ و بدأت ب ابوك تحس !؟

كان شـــــايل هـم وحده هوه اللي يشيـــله بس

والله إن عشتـــوا تبنـــوا إنت و أختـك و اخـوك

مستـور طول ماانت إبنه و يتيــم من غير ابوك

قــوم يا بني و خد دواك العمــــر ما تضمنـــوش

أبـوك محتــــــاج دعـاك إدعيــله ما تنسـاهـوش