قصيدة ماتت أمي للشاعر محمد هيكل
11:50pm 15/12/23
صورة معبرة
ميرفت رضوان
وأهي ماتت أمي بدون سيره لا الخوف والحزن يمـــوتني
وعرفت حاجـــات ياما كتيره بعد أما سابتنـي و فارقتنـي
مين يصحى عشاني ومن بدري و يوماتي يعافر ما يكلّش
مين يفضل طول الليــل يجري و يشيل ويحط ومايملّش
مين يـدّي و يخلص بضميره زيك ياجميله يا أجمل حد
مين كل منــاه يسعـد غيره ولا عمره فمره استنى الرد
مين لما تضيـع مني حاجاتي يلاقيها و يضحك غير هيه
طب مين هيرتبـلي حيـــاتي و يحلي الأيـــــام ف عنيه
دنيتـي و هدومــي المتسابه تـتـرص و تتهنـــــدم تانـي
طلباتي ف لحظتهـــا مجابه و مشـاكلي تحلها ف ثواني
أنا يامـــا زعلت و من قلبـي و بضمـه بنـام مش زعـلان
بس أمازعلت ومهيش جنبي أنا زعلي إتحــــول أحــزان
و عرفت إن الدنيــا عشانهـا كارمـــاني و فتحالي بيبانها
مفــاتيح السعد ف دعــوتها و الخير والرزق على جبينها
طب مين يدعيلي بقى ياستي بدموع العين و بقلب كسير
طب مين دعـــــوته زيك إنتي بتروح ع السما وبتنزل خير
و عرفت كمــــان ان أمــاني مش قفـــل البـاب بالتـرباس
حضنها دا أمان وحنان تاني عمــــره ما يتعـــوض بالناس
أناعشت رضيع عمري فخيرها ولا يوم احتاح حد فحاجه
دلوقتي كبيـر واهو من غيرها أقسم بالله ماسواش حاجه
ماهي كانت ضله وبيت وجبال وبلاد و شــوراع و مدارس
و الله ما كانت ست محـال أنا أمي دي كات مليون فارس
كل اللي عرفتـه انا يا أمي بتمنى المــوت ييجي قـريب
دا محدش بعدك هايسمي و محـدش بعــــدك هيطيـّـب
و عرفت أخيــــرا يا أميره إن الايــــام عــادي خـانتنــي
بحّــــار و معـاه التأشيــره و بحــور الأحـــزان ندهتنــي
علشان كده موتّي بدون سيره لا الخوف و الحزن يمــوتني
