قصيدة هي حوا
12:07pm 08/12/23
الشاعر راضي علي الطهطاوي
راضي علي الطهطاوي
هىَّ حوَّا ما حد غيرها
ماشية واثقة ف خط سيرها
اللي راسمة طريق أملها
والرَّشاقة والأناقة
واللي تبهرنا بجمالها
واللي قادرة ع التَّحدِّي والمواجهة والصمود
م الصَّعاب تقدر تعدِّي بالثِّقة نحو الصعود
كل أنثى ف الوجود رمز الحنان؟! ..والحنين رمز الأمومة
ضحكة منها تجيب أمان.... ع الخصوص ويَّا العمومة
هىَّ بستان الزُّهور ... اللي فتَّح ف الجناين
هىَّ بدر يشع نور.....ف السَّما والأرض باين
هىَّ ينبوع المحبَّة
ربنا عزَّز قيمتها ..... ربَّنا كرَّم وسوَّى
هىَّ حَوَّا
اللي تبقى ركن سانِد ليك في شِدَّة
لو في يوم الموج يعاند.... تكسره وبكل حِدَّة
اللي بتشرَّف بلادها .....ف المواقف والمحافل
واللي بتعلِّم ولادها .....كل خير جُوَّاها حافل
هىَّ ضحكة لكون تبَسَّم ..إيه ربيع من غير ورود؟!
هىَّ عطر لصيف تنَسَّم... والدَّفا وقت البرود
كنز غالي ...صوتها عالي......بالغُنا والحُب دوَّى
.
هىَّ بنتك أحلى ضحكة ف قلب بيت
هىَّ أختك سر روحك لو حكيت
هىَّ حُبَّك نُص حلو يداوي جرحك لو بكيت
هىَّ أمَّك لو تغيب عنَّك في يوم
ينطفي نور الحياة......مهما نور الشَّمس ضوَّى
.
شايلة همَّك جُوَّة بَرَّة
هىَّ منبع خير وفرحة والسَّعادة والمَسرَّة
مين يوفِّيها الجمايل
مهما يشكر ألف مرَّة
لمَّا بتضحِّي بتفاني .. صوتها بيصحِّي الأغاني
هىَّ ف البيت العمار ...ليل نهار
هىَّ صبر مع العزيمة ... ربِّنا ع الحٍمل قوَّى
..
هىَّ مصدر كل بهجة ... رقَّة إحساس أُنس جذب
هىَّ غنوة بكل لهجة........ هىَّ لحن الحُب عذب
عطرها ف الكون يفوح .. ابتسام يمحي الجروح
حَوَّا نور للحُب عاكِس ..حَوَّا نار لو جيت تعاكِس
هىَّ حصن الإحتواء ...هىَّ خط الإستواء
مهما خط السِّير تلوَّى
هىَّ شمس عطاء و طاقة ... بس للي يستحق
غمزة من نظرة عينيها........الحجر بيلين يرق
هىَّ إلهام الفنون ... والونَس ف الكون...سكون
هىَّ سر الإبتهاج فوق جبينها الرحمة تاج
هىَّ نهر الحُب صافي....للجفاف ف الدُّنيا روَّى
