حفل جواز آدم وحَوَّا

لمّا حَوَّا شافها آدم ... قلبه ليها رق مال
قال لها مخلوقة مِنِّى ... والتقاها على الجبال
كنت من غيرك هاتوه ... والحياة تبقى انعزال
قلبى يعشق بس مين ؟! ... وِحْدِتي فيها اعتلال
قال لها لبعض اتخلقنا ... واحنا للأمر امتثال
والجواز مكتوب علينا ... وانتي زوجتي بالحلال
فاكهة البستان دا مَهرك ... والورود فستان وشال
والغصون نعملها كوشة ... والوفا أجمل مثال
والوَسَع دا كلُّه بيتنا .... بُكرا نملاه بالعيال
فِرْحِت الأرض بزفافها ....والحنان ف النَّبض سال
والطُّيور غنَّت موسيقى .. والشَّجر رقص احتفال
والشُّهود كانت ملايكة .... حفلة كانت م الخيال
إنتي أغلى نعمة عندي ...واهجرِك دا شئ محال
واسندك وبتسنديني .... لو وجع فاق إحتمال
ربٍّنا خالقِك هديَّة .... تِمْلا كل الكون جمال
لولا حَوَّا ف الحياة ... يعني إيه معنى الرِّجال؟!
بينا احنا الدُّنيا تعمر ... بالوَنَس نبقى اكتمال
والأنوثة سر فيكي ... حَوَّا نبراس الدَّلال
أنتي شمس كنوز حياتنا ... والبدور جنبِك هلال
والأمومة نابعة منِّك .. حُب مخلوق م الكمال 
دا اللي يأذي السِّت حًوَّا ... يبقى جُوَّاه اختلال