قصيدة العندليب عبد الحليم حافظ للشاعر : راضى على الطهطاوى عضو اتحاد كتاب مصر

ياللي مليت الدُّنيا بصوتك 
حُب ولهفة وشوق وحنين
يا غنوة فراق مع دمع 
ياللى رميت من حزنك وردك
ياما طفيت م الحزن الشَّمع 
ياللي غُناك كان ضحكة وفرحة 
ولحن موسيقى وباحلم بيك
يا ما كتبت جواب لحبيبتك
ياما حكيت عن طول لياليك
ياللي قريت فنجان بالعزف
ياللى تعبت كتير من نزف
ياللى ملامح وشَّك كانت 
فرْح وجرْح وإحساس عالي
يحكى آهات من قلب حزين
...
ياللي مليت الدُّنيا بصوتك 
حُب ولهفة وشوق وحنين
ياللي مشيت وحدك سوَّاح 
ياللى مسكت هواك بإيديك 
ياللي نهارك كان روَّاح 
كان باين حزنك ف عينيك
عاشق ليالي الصَّبر 
بالحزن ليه موعود
يا ابو العيون السود
مدًّاح عشانك يا قمر 
دمع الفراق انهمر
صوت الشجن من نبرتك 
يوصف دمع فراق و سنين
..
ياللي مليت الدُّنيا بصوتك 
حُب ولهفة وشوق وحنين
ياللي مشيت ع الشُّوك بمشاعرك
تحكى العتاب والجوي
زي الهوى جبَّار 
عدَّى النهار 
يا غنوة وطن 
يا عندليب
لفي البلاد ياصبية 
هتعيش بلادي أبية 
وبتلوموني ليه
يصرخ حبيبي راح 
وانفتح بركان جراح
حتَّى في أحضان الحبايب 
غربة ودموع و أنين
ياللي مليت الدُّنيا بصوتك 
حُب ولهفة وشوق وحنين