خدوا المحمـــــول ب رناتـه
خدوا الفيس بوك و اخـــواته
خدوا الواتس ٱب و أجدع لاب
خدوا الشـات كله ب حاجـاته
خـــدوا النــووي خــدوا الذرّه
و مـــــوت محاوطنــا من بـرّه
و ناس ب زار تشــــــــرّد ناس
وناس في المـــــوت بتتعـــرّى
خدوا النيــش اللي ف الأوضه
خدوا الكرانيش خدوا الموضه
خدوا التلاجـه مش هشرب
سنيـن و النفــس مســـدوده
خدوا التكييـف خدوا الشاشـه
أنا لا انا بيـه و لا باشــــا
خدوا الخـــوف اللي من بكره
و ٱه في الحلق متحاشــه
و هــــــــاتوا تاني لمتنــــــا
و طيبـــة الناس في حتتنـــــا
و هاتوا حصيــــرتي و المسند
و قعــــدة مصطبـــــة بيتنــــا
و هــــاتوا القلتيــن و الـزيــر
و فرحــه و ضحكتين بضمير
و توتــه و نخلـه وقت الضيق
يرشـــوا فوق سطوحنا الخير
هاتــــــولي الطشـت و الأبريـق
و قلب سليــم قـــــــوي و برئ
هاتــــــــــولي كل يــوم عـــدّي
بنـــــام فيه أسعــد المخاليـق
و نـاس كات فيهــــا حنيـــه
و بـراد شـــاي في عصــــريه
و هـــاتوا أبــويا و عمــــامي
و خــــالي و فرحتـــــه بيــا
خدوا السرطان خـدوا كـورونا
خـــدوا الأحــــزان و فارقـونا
ما بين أحــــلام و بين ألغــــام
سنيــن العمـــــــر ملعـــــونه
خدوا حياتكـوا الجميله العـال
و هاتوا حياتنــا و احنـا عيـال
خدوا كل اللي نفسكـــوا فيـه
و هـــاتوا تانـي راحـــة البـال
