مقالات
ما وراء التعب بقلم: نشأت البسيوني
حجم الخط:
في وقت معين بييجي عليك تحس إنك وصلت لمرحله ما تعرفش فيها انت محتاج ترتاح ولا محتاج تكمل ولا محتاج تبعد ولا محتاج حد يحتويك تحس إنك ماشي في طريق طويل كل اللي فيه بيغرقك وبيشدك من كل اتجاه وبتسأل نفسك انت ليه بقيت بتحس بالحاجه بزياده وليه بقيت بتزعل بسرعه وليه بقيت ساكت حتى لما الوجع يزيد وليه بقيت بتفهم نظرات الناس اكتر من كلامهم وليه
بقيت بتعرف النوايا من قبل ما تتقال ويمكن ده كله عشان التعب اللي جواك بقى واصل لمرحله ما بقاش ينفع يتخبى وبقى باين في عينك وفي صوتك وفي هدوئك اللي الناس فاكرينه رضا وهو في الحقيقه هدنه مع روحك وتلاقي نفسك بتتغير وانت مش واخد بالك بتتغير في طريقه كلامك وفي ردودك وفي تفاصيلك الصغيره اللي كانت زمان بتفرق معاك قوي وبقت دلوقتي ما تستاهلش حتى
انك تفكر فيها وتلاقيك بتنسحب من حاجات كتير ومن ناس كتير ومن معارك ما لهاش لازمه لأنه خلاص بقى عندك وعي يعرف يحدد مين يستاهل تفضل ومين وجوده عبء ومين كلامه مسموح يدخل قلبك ومين لازم يوقف عند حدود عقلك وتتأكد إن التعب مش دايم وإن الجرح مش نهاية وإن اللي اتكسر ممكن يقوم من جديد حتى لو رجع بشكل مختلف المهم إنه يرجع وتفتكر كل اللي مر عليك اللي
كانت نهايته وجع واللي كانت نهايته حكمه واللي كانت نهايته خساره واللي كانت نهايته بدايه واللي كان وجوده درس أهم بكتير من الكلام اللي اتقال ساعتها وتعرف إنك كنت بتمر بكل مرحله علشان توصل لنقطه زي اللي انت فيها دلوقتي نقطه فيها وعي أكتر سكون أكتر نضج أكتر واهتمام بنفسك أكتر وحتى لو التعب لسه جواك لسه ماسك طرف روحك لسه بيسحبك اوقات للوراء إلا إنك
بقيت عارف إنك مش زي زمان وبقيت فاهم إنك لوحدك مش محتاج حد يفسر وجعك ولا حد يثبتلك قيمتك ولا حد يجي يعالج حاجه كسرتك لأنك بقيت انت اللي بتشيل نفسك من الارض وتوقفها وتوصل للحظه تدرك فيها إن التعب مش نهايه التعب علامه إنك لسه عايش ولسه بتحس ولسه بتقاوم ولسه فيك جزء صغير مهما اتضغط ومهما اتخنق لسه عايز يكمل ولسه شايف في
بكرة حاجه تستحق إنه يقوم علشانها ويمكن يكون الجزء ده هو اللي يشيلك وهو اللي يفتح لك طريق جديد ويقولك إنك أقوى من اللي حصلك وأكبر من اللي ضايع منك وأغنى من اللي سابك ومكمل مهما اتقل الحمل لأن روحك مهما تعبت بتعرف ترجع توقف
