جيهان الشرقاوى تكتب : إلى المرأة فى يومها العالمى
في اليوم العالمي للمرأة… خلينا نتكلم بصراحة شوية
كل سنة في اليوم ده بنقول للمرأة:
أنتِ قوية… أنتِ عظيمة… أنتِ تقدرِي على كل حاجة.
بس الحقيقة النفسية اللي بشوفها كل يوم في العيادة مختلفة شوية…
الست في مجتمعنا مش بس بتعيش أدوار كتير،
هي كمان شايلة توقعات ناس كتير.
لازم تبقى:
أم مثالية…
وزوجة متفهمة…
وبنت بارة…
وشاطرة في شغلها…
وقادرة تحتوي الكل…
ولو تعبت؟
أو قالت أنا محتاجة حد يسندني شوية؟
يتقال لها ببساطة:
“إنتِ قوية… هتعدي.”
بس علم النفس بيقول حاجة مهمة جدًا:
القوة طول الوقت… من غير مساحة للراحة أو الضعف…
مش قوة حقيقية.
دي أحيانًا بتبقى إرهاق نفسي متخبي ورا الابتسامة.
كتير من الستات اتربوا على جمل زي:
“استحملي علشان البيت.”
“اسكتي علشان الأولاد.”
“ضحي… ده دورك.”
بس الحقيقة اللي لازم تتقال بوضوح:
الست مش دور اجتماعي بس…
الست إنسانة.
لها مشاعر…
ولها طاقة بتخلص…
ولها حق تتعب وتطلب دعم.
واللي ناس كتير ما تعرفوش إن
الصحة النفسية للمرأة مش رفاهية.
المرأة المتوازنة نفسيًا
بتربي طفل آمن نفسيًا…
وبتخلق بيت أهدى…
ومجتمع أرحم.
في اليوم العالمي للمرأة…
مش بس محتاجين نقول للست: إنتِ قوية.
محتاجين كمان نسألها:
إنتِ محتاجة إيه علشان تبقي بخير؟
